Үндсэн хуульд заасан эрүүл аюулгүй орчинд амьдрах эрх минь хаана байна аа. Энэ эрхээ хэнээс, хаанаас нэхэж, зөв зохистой эдлэх вэ?

Утаа униар нь гамшигийн хэмжээнд очиж, хүнсний  хэрэглээ нь аюулгүй хэмжээнд хүрч чадахгүй байгаа. Гэтэл бас дээрээс нь ая тухтай  алхах эрхгүй болоод байна.  Ар араасаа дараалан гарч ирэх  барилгын компаниуд олширч, бүтээн байгуулалтын салбарыг хөгжүүлж  ихийг хийж бүтээж байгаа ч хууль дүрмээ барьдаггүйгээс болж барилга гэгч нь айдас хүйдэс дагуулж, эрдэнэт хүний амь насыг авч одох хэрэгсэл болоод  байна. Саяхан Согино хайрхан дүүргийн нутаг дэвсгэрт хичээлээ тараад явж байсан бяцхан охины дээрээс бетоны помп нурж амь насыг нь хороосон бол түүнээс хоёр хоногийн дараа Хан-Уул дүүргийн 14-р хорооны нутаг дэвсгэрт байрлах “Хурд” компаний барилгын кран нурж 26 настай С... гэгч краннист залуу амиа алдлаа. 

Эдгээрээс цочироо авсан уу яасан Мэргэжлийн хяналтынхан, Нийслэлийн удирдлагууд  хурал хийж энэ асуудал дээр хариуцлагатай хандах цаг ирснийг санууллаа.  Улаанбаатар хотод нийтдээ 80 гаруй барилга албан ёсны зөвшөөрөлгүй баригдаж байхад хаагуур нь өнгөрсөн юм бэ гэж нийслэлийн удирдлагууд шүүмжлээд мэргэжлийн хяналтын газрын дарга Л. Бямбасүрэнг үүрэгт ажлаас нь чөлөөлөх шийдвэрийг  гаргасан юм.

Гэв ч Л. Бямбасүрэн зөвшөөрөлгүй баригдсан компаниудад олон удаа мэдэгдэл хүргэсэн ч тэд үргэлжилүүлсээр хүний аминд хүрлээ. Бидэнд удаа дараа мэдэгдэл хүргүүлэхээс өөр эрх байхгүй. Болдогсон бол жоотуу  бариад зогсоохсон даанч надад тийм эрх байхгүй. Тиймээс би үүрэгт ажлаа хүлээлгэн өгч чадахгүй гэж мэдэгджээ.

"Үхэхийг хүсвэл баригдаж буй барилгын доогуур яв" гэсэн хошин ч юм шиг, эмгэнэлтэй ч юм шиг яриа гарсан байна. Нийслэлд нэмж барилга барихыг хоргилсон шийдвэр гарсан. Тэгвэл одоо зөвшөөрөлгүй баригдсан барилгын үйл ажиллагааг нь зогсоож, баригдсан ч халуун хүйтэн ус, дэд бүтцээр хангахгүй гэсэн шийдвэрийг хатуу баримтлахаар боллоо.  Үнэхээр л хууль хууль шиг, дүрэм нь дүрэм шиг байж чадвал айдасгүй амьдрах цаг ирэх л бололтой.
                                                                                                                                                                             Л.Мөнхчимэг