Монгол Улсын Их Хурлаас 2024 онд Мэргэжлийн нэгдсэн холбооны эрх зүйн байдлын тухай хуулийг баталж 2025.01.01-нээс хүчин төгөлдөр мөрдөгдөж байгаа билээ.  Энэхүү хуулийг хэрэгжүүлэх хүрээнд барилгын салбарын мэргэжлийн нэгдсэн холбоо байгуулах цаг үеийн шаардлага үүсэж улмаар салбарын мэргэжлийн холбоод нэгдсэн ойлголцолд хүрч барилгын салбарын ТББ-уудын Ерөнхийлөгчид “Харилцан ойлголцлын санамж бичиг”-т гарын үсэг зурах арга хэмжээг 2025.03.26-ны өдөр МҮХАҮТ-ын байранд зохион байгууллаа. 

Барилгын салбарын мэргэжлийн нэгдсэн холбоо байгуулснаар дараах үр нөлөө гарах ба Үүнд: 

• Барилгын салбарт үйл ажиллагаа явуулж байгаа олон төрийн бус байгууллагууд нэгдэж цар хүрээгээ тэлэх, олон улсад үйл ажиллагаа нь хүлээн зөвшөөрөгдөх, ур чадвар нэмэгдэх, улам мэргэших үндэслэл бий болох;
• Барилгын салбарын бодлого, хөтөлбөр боловсруулалт болон төрийн байгууллагын шийдвэр гаргалтад санал өгөх, салбарын нийтлэг эрх ашгаа хамгаалах,  мэргэжлийн байгууллагын үзүүлэх нөлөө нэмэгдэх;
• Барилгын салбарт хамаарах төрийн зарим чиг үүргийг Мэргэжлийн нэгдсэн холбооны эрх зүйн байдлын тухай хуулийн дагуу байгуулах гэрээний эсхүл хуулийн дагуу гүйцэтгэх нөхцөл бүрдэх;
• Барилгын салбарт төр, хувийн хэвшлийн түншлэл бүрдэх, улам сайжрах;
• Салбарт хамаарах асуудал төрийн байгууллагын хэт төвлөрсөн чиг үүргийг задалж, зарим чиг үүргийг илүү мэргэшсэн төвшинд гүйцэтгэх боломж бүрдэх;
• Барилгын салбарын бизнесийн болон хөрөнгө оруулалтын орчныг сайжруулахад оруулах хувь нэмэр, үр нөлөө нэмэгдэх.

Цаашид нэгдсэн холбооны дүрмийн төсөл боловсруулах болон холбоогоо бүртгүүлэх бэлтгэл хангах ажлуудыг холбоод хамтран хийх  учир санамж бичиг зурах арга хэмжээний үеэр барилгын салбарын мэргэжлийн холбоод нэгдэж эхэлж байгаатай холбоотойгоор тус салбарт үйл ажиллагаа явуулж байгаа бусад холбоодыг нэгдэхийг уриалсан уриалга гаргалаа. 

Тус нэгдсэн холбоонд Монголын Барилгын Үндэсний Ассоциаци ТББ, Монголын Барилгын Инженерүүдийн Холбоо ТББ, Монголын Барилгын Инженер Геологичдын Холбоо ТББ, Монголын Барилгын Гүйцэтгэгч Байгууллагуудын Холбоо ТББ,         Өргөн Тээвэрлэх Машин Төхөөрөмж Үндэсний Холбоо ТББ,  Монголын Бетоны Холбоо ТББ, Барилгын  Ханган  Нийлүүлэгчдийн  Зөвлөл ТББ, Монголын Цонх Хаалга Үйлдвэрлэгчдийн Холбоо ТББ, Монголын Нийгэм Ахуйн Барилгын Холбоо ТББ,  Монголын Инженерийн болон Зөвлөх Үйлчилгээний Үндэсний  Холбоо ТББ, Монголын Барилгачдын Нэгдсэн  Холбоо ТББ, Хөгжлийн Төлөө Барилгачдын Нэгдэл ТББ-ууд нэгдлээ.