2025 онд арилжааны банкнууд пассив болон ногоон орон сууц руу чиглэсэн зээл олголтоо нэмэгдүүлэх чиглэлтэй байна. 2024 оны эцсийн байдлаар арилжааны банкнуудын ногоон зээлийн үлдэгдэл нийт зээлийн 3.7 хувийг эзэлж байгааг Монголбанк тайлагнасан юм.

Нийт ногоон зээлийн 68.9 хувийг буюу хамгийн их хувийг эрчим хүчний хэмнэлтийн чиглэлд олгосон бөгөөд үүний дотор эрчим хүчний хэмнэлттэй барилгын салбарт түлхүү олгожээ.

Монгол Улс 2030 он гэхэд ногоон зээл олголтыг нийт зээлийн багцын 10 хувьд хүргэх зорилт тавиад байгаа юм. Арилжааны банкнуудын ногоон орон сууцны зээлийн нөхцөл нь ихэвчлэн хамтран ажиллагч ногоон барилгын компаниар барилгаа бариулах, эсвэл тэдний барьсан барилгаас худалдан авах шаардлага тавьдаг аж.

Банкнуудын ногоон орон сууцны зээлийн нөхцөлүүдээс харахад Худалдаа, хөгжлийн банк жилийн 15 хувийн хүүтэй, 20 хүртэлх жилийн хугацаатай нэг тэрбум төгрөг хүртэлх ногоон амины орон сууцны зээл олгох боломжтой юм байна.

Харин Голомт банк эрчим хүчний хэмнэлттэй амины орон сууц худалдаж авахад 20 хүртэлх жилийн хугацаатай, 300 сая төгрөг хүртэлх зээл олгож байгаагаа мэдээллээ. Төрийн банкны хувьд эрчим хүчний хэмнэлттэй амины орон сууц барих болон худалдан авах зээлийн дээд хэмжээ нь 500 сая төгрөг байх бөгөөд 20 жилийн хугацаатай шаталсан хүүтэй гэдгээ тодотголоо.

Эх сурвалж: Bloombergtv.mn