Монгол улсад барилгын салбар үүсч хөгжсөний 86 жилийн ойн баярын хүрээнд барилгын салбарт дэлхийн дэвшилтэт техник технологи, бүтээгдэхүүнийг нэвтрүүлэх “Барилга Экспо-2012” олон улсын үзэсгэлэн яармагыг “Дэлхийн хөгжлийг Монголд” уриан дор 4 өдрийн турш Мишээл экспо төвд амжилттай зохион байгууллагдаж өндөрлөлөө.

    Үзэсгэлэн яармаг олон улсын гэдэг утгаараа 12 орны 100 гаруй компани өөрсдийн үйл ажиллагаа, бүтээн байгуулалт, барилгын дэвшилтэт материал бүтээгдэхүүнээ олон нийтэд танилцуулж, сурталчиллаа.

     Энэ удаагийн үзэсгэлэн яармагийн хамгийн содон сонирхол татсан техник технологи нь Щвейцарь улсын сэргээгдэх эрчим хүч, газрын гүний дулаан, нарны энергээр барилга байгууламжийнхаа эрчим хүчийг хэрхэн шийдсэн, 2050 автомашины  зогсоолын барилгыг сэргээгдэх эрчим хүч ашиглан монголын цаг уурын нөхцөл, архитектурын онцлогт тааруулан хийсэн байгууламжууд байсан юм. Мөн үндэсний барилгын компаниуд өөрсдийн үйлдвэрлэсэн материал бүтээгдэхүүн болон үйл ажиллагаагаа танилцууллаа. Сэрүүний улирал дөхөж байгаа учраас үзэгчид ихэвчлэн халаалтын болоод сантехникийн материалыг түлхүү сонирхож байсан.

      Үзэсгэлэн яармагийн өдрүүдэд үзэгчдийн дунд танин мэдэхүйн АХА, амины орон сууцны зөвлөгөө, үл хөдлөх хөрөнгө худалдан авахдаа анхаарах зүйл гэх мэт олон сургалтуудыг зохион байгууллаа. Цаашид ч гэсэн үзэсгэлэнгийн үеэр энэ чиглэлийн сургалт, семинарыг байнга зохион байгуулах нь үзэсгэлэнг зорьж ирсэн үзэгчдэд үр өгөөжтэй байх юм.