Шинэ сэргэлтийн бодлогын хурдасгуур төвийн судлаачид орон сууцны хөнгөлөлттэй зээлийн хүртээмж нэмэгдүүлэх талаар судалгаа хийсэн байна. 

Тодруулбал, Ипотекийн зээлд нийт 10 их наяд төгрөг зарцуулж, 130 мянган айл шинэ байранд орсон ба уг зээлийн хүү 8 хувь байсныг 6 хувь болгон цар тахлын үеэр бууруулсан нь одоог хүртэл мөрдөгдөж байна. 

Харин ипотекийн зээлийн хүү 6 хувь буюу бодлогын хүүнээс хэдэн нэгж доогуур тул энэ зээлийг авах айлууд олон, дугаараа хүлээн, банкнуудад зээлийн хүсэлтээ өгсөөр. Хүн бүр авахыг хүсэх зээл болсон байна.  

Шинэ сэргэлтийн бодлогын хурдасгуур төвийн судлаачид хэдий хөнгөлөлттэй зээл боловч энэ бол татаас гэв. Учир нь Зургаан хувийн зээл авсан нэг айл улсаас 200 сая төгрөгийн татаас авсан гэхэд болно. Учир нь зээлийн хүүний зөрүү, 20 жилийн турш буюу удаан хугацаанд төлж байгаа зэргийг тооцоход 200 сая төгрөгийн татаасыг нэг айлд өгчээ.

Ипотекийн зээлийг утаа, түгжрэл бууруулах бодлоготой холбож хэрэгжүүлээгүй тул 10 их наяд төгрөг зарцуулсан ч гэр хорооллын айлууд цөөрөөгүй байна. Учир нь 6 хувийн хүүтэй Ипотекийн зээлийн хамгийн их нягтаршил бүхий хотын төвд байр авсан иргэдэд олгожээ. Зээлийн хүүг аль болох бага байлгах гэсэн нь эргээд сөрөг нөлөө үзүүллээ гэж судлаачид танилцууллаа. Өөрөөр хэлбэл энэ зээлийг зах зээлийн зарчмаар шийдээгүй ба арилжааны банкнуудын хүү 17 хувь байхад уг зээл 6 хувь байгаа юм. 

Шинэ сэргэлтийн бодлогын хурдасгуур төвийн хийсэн судалгаанаас гарсан САНАЛ

• Шинэ сэргэлтийн бодлогын хурдасгуур төвийн судлаачид цаашид хотын төвд байр авах гэр бүлд 6 хувийн зээл өгөх нь буруу. Хашааны газраа өгсөн, анх удаа байранд орох өрхүүдэд л 6 хувийн зээл өгөх ёстой. Учир нь энэ зээлээр хоёр дахь байраа авсан тохиолдол бий гэв.
• Зургаан хувийн зээлийн олдоц буурсан тул эх үүсвэрийг нэмэх шаардлагатай. Төв банк, Хуримтлалын сан болон эргэн төлсөн зээлийн төлбөрийг нийлүүлээд жилд нийслэлийн 6000 орчим өрх 6 хувийн зээл авдаг. Цаана нь авах хүсэлтэй олон өрх бий тул банкнуудын эх үүсвэрийн хүүг бууруулах боломжийг судалж эхэлжээ.
• Одоо банкнууд жилийн 17-18 хувийн хүүтэй, ипотекийн зээл өгч байгааг бодлогын хүүнээс 2 нэгжээр өндөр, 14-15 хувь руу бууруулбал иргэдэд ээлтэй зээл болно.
  
  Зургаан хувийн зээлийг өрх бүрд өгч чадахгүй тул 18 хувийн хүүг бууруулахад анхаарна. Учир нь 6 хувийн зээл өмнө нь хүрэлцээгүй, цаашид ч хүрэлцэхгүй тул банк 18 хувийн зээлийн хүүгээ 14 болговол зөрүү 4 хувийг нь төрөөс татаас эсвэл зээлийн баталгаа өгч болох, эсэхийг судалж байгаа юм байна.
• Ипотекийн нийт зээлийн 70 хувийг 6 хувийн зээл эзэлснийг харвал  төр энэ зах зээлд хэт их оролцсон нь илэрхий болно. Шинэ сэргэлтийн бодлогын хурдасгуур төвийн судлаачид дээрх дүгнэлт саналаа Орон сууцны үндэсний хороо, Засгийн газрын хуралдаанд танилцуулах юм байна.