2025 оны гуравдугаар сард АНУ-д нэг өрхийн орон сууцны дундаж үнэ шинэ дээд түвшинд хүрэх төлөвтэй байгааг “Corelogiс” тооцооллоо. Одоогийн байдлаар тус улсад нэг өрхийн орон сууцны дундаж үнэ 375 мянган ам.доллар байгаа аж. Мөн медиан үнэтэй орон сууц худалдан авахад жилийн 83 мянган ам.долларын орлоготой байх шаардлагатай гэж тооцоолжээ.

Тус улсад 2024 оны нэгдүгээр сараас энэ оны нэгдүгээр сарын хооронд орон сууцны үнэ 3.3 хувиар өсөөд байгаа аж. Улирал солигдож байгаатай зэрэгцэн орон сууцны үнэ харьцангуй тогтвортой байсныг “Corelogiс” онцоллоо.

Харин ирэх оны нэгдүгээр сар гэхэд АНУ-д орон сууцны үнэ дунджаар 3.6 хувиар өсөхөөр байна. Түүнчлэн мужийн байршлаасаа хамаарч үнийн өсөлт харилцан адилгүй байхыг судалгаанд тодотгожээ.

Энэ оны нэгдүгээр сарын байдлаар Флорида мужид орон сууцны үнэ өмнөх оны мөн үетэй харьцуулахад, хамгийн бага өөрчлөлттэй байна. Тухайлбал: Флоридагийн Тампа хотод орон сууцны үнэ 0.9 хувиар буурсан бол Сарасота хотод 2.7 хувиар буураад байгаа аж.

Харин орон сууцны үнэ хамгийн их өссөн муж нь Нью-Йорк болоод байна. Тус мужийн хотуудад орон сууцны үнэ 7-10 хүртэлх хувиар эрчимжжээ.