Барилгын салбартай холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээг улирал бүр шинэчлэн гаргадаг Барилга МН сэтгүүлийн 2025 оны гуравдугаар сарын дугаар уншигчдадаа хүрч эхэллээ. 

Энэ сарын дугаарын нүүр хуудсанд Топ Керамикс ХХК хамтран ажиллалаа. 

 178 дахь дугаарт гарсан онцлох булангуудаас танилцуулбал, 

VIP ЗОЧИН: 

Дэлхийн томоохон улс орнууд бизнесийн бүхий л салбарт “ногоон” хэв загварт шилжиж, ногоон санхүүжилтээр хөрөнгө оруулалтын эх үүсвэрээ удирдаж эхлээд багагүй хугацаа өнгөрч байгаа төдийгүй Монгол Улсад ч ногоон барилгын салбарыг хөгжүүлэх зайлшгүй шаардлага тулгарч байна. Тиймээс энэ удаагийн VIP ярилцлагын зочин хоймортоо УИХ-ын гишүүн, цөмийн физикийн доктор А.Ундрааг урьж ярилцлаа.    

НИЙТЛЭЛ:

Дэлхийн өвийн хадгалалт хамгаалалтын мэргэжилтэн, Японы соёлын өвийн хамтын ажиллагааны концерцум О.Ангарагсүрэн “Монголын түүхэн дурсгалт барилга, архитектурын дурсгалын өнөөгийн байдал” цуврал нийтлэл хүргэж байгаа билээ. Тэгвэл энэ удаагийн дугаарт “Эрдэнэзуу хийдийн Гол Зуу, Баруун болон Зүүн Зуу сүмүүд” III хэсгийг хүргэж байна. 

ХӨНДӨХ СЭДЭВ 

Барилгын тухай хууль, норм нормативын баримт бичгийн ерөнхий тогтолцоо буюу заавал мөрдөх шинж чанартай норм ба дүрэм болон техникийн зохицуулалтыг хэрэглэж байна. Мөн сонгон хэрэглэх баримт бичигт барилгын дүрэм, стандарт, заавар цомог аргачлалыг ашиглаж байгаа юм. Тэгвэл энэ удаагийн дугаарт Барилгын салбар дахь баримт бичгийн тогтолцооны өнөөгийн байдал, тулгамдаж буй асуудлын талаар хөндөн бичлээ. 

АРХИТЕКТУР ДИЗАЙН: 

Итали улс нь өмнөд европт орших бүгд найрамдах улс бөгөөд хүн төрөлхтний соёл иргэншлийн түүхэнд үлэмж нөлөө үзүүлсний дотор архитектурын гайхамшгаараа онцгой өв, соёл, дурсгалтай юм. ЮНЕСКО-ийн соёлын өвд 55 орчим архитектурын дурсгал бүртгүүлсэн нь дэлхийд 1-рт орох үзүүлэлт бүхий тус улсын архитектурын гайхамшиг болсон барилгуудын талаар уншина уу. 

МИНИЙ ТҮҮХ

Магадгүй, хүн бүрийн амьдралд, бүхий л зүйлд зүрх сэтгэлээрээ ханддаг хэн нэгний түүх байдаг байх. Миний бичих барилгачны тухай түүх шиг.  “Ажилтай байх сайхан” гэж нүүр дүүрэн инээмсэглэн ярих түүний нүд хааяа ихийг өгүүлэх шиг гүн ширтэн, хааяаа юунд ингэтлээ яарсан юм бол гэмээр тогтворгүй хаа нэгтээ гүйнэ. Гүн ширтэх харц нь ихийг үзэж туулсныг нь, тогтворгүй гүйх харц нь цагтай уралдаж дуусгах ажилдаа яарсных байх гэж таамаглав. Барилга МН сэтгүүлийн "Миний түүх" булангаас энгийн нэгэн барилгачингийн түүхийг уншаарай.

СУДАЛГАА

Барилга бүтээн байгуулалтын улирал эхэлж буй энэ цаг үед Барилга МН сэтгүүлийн судалгааны буланд Бетоны үнийн судалгааг хүргэж байна. 

ТОДРУУЛГА

Нийслэлийн Засаг Даргын Тамгын газраас агаар орчны бохирдолыгбууруулах ажлын хүрээнд энэ хавар гэр хорооллын 200 мянган өрхөөс 15 мянган өрхийг хийн түлшинд холбох талаар мэдээлсэн. Хийн түлшээр ахуйн хэрэгцээгээ бүрэн шийдэхийн тулд ОХУ-аас хийн түлш экспортлох, хүрэн нүүрснээс хийн түлш үйлдвэрлэх технологи болон үйлдвэр барих талаар НИТХ-ын төлөөлөгч Ч.Батзоригоос тодрууллаа.  

ЗАЛУУ ИНЖЕНЕР

Бусдад  үнэлүүлэх гавьяа шагнал, одон тэмдгээс илүү мэргэжлийн зорилго, мэдлэгээрээ ирээдүйг бүтээх хүсэл өвөртлөн, эх орныхоо хөгжил дэвшил, бүтээн байгуулалтыг цогцлоох манлайлагч залуусыг Залуу инженер буландаа онцолдог билээ. Тэгвэл энэ удаагийн дугаартаа салбартаа 15 дахь жилдээ ажиллаж буй Барилгачин худалдааны төвийн Ерөнхий инженер Э.Рэнцэндоржийг онцолж байна. 

Мөн та Барилга МН сэтгүүлээс орчин үеийн орон сууцны үнэ ханш болон ажил гүйцэтгэлийн тайлан,  шинэ орон сууцны судалгаа зэргийг уншаарай. 

СЭТГҮҮЛ ЗАХИАЛАХ 

Онлайн унших

Утас: 9100-0233, 7711-3333