Нийслэлийн Худалдан авах ажиллагааны газарт нийслэлийн Засаг даргын 2025 оны “Эрх шилжүүлэх тухай” 19 захирамжаар нийт 106 төсөл, арга хэмжээний эрх шилжин ирсэн. Уг 106 төсөл, арга хэмжээний захиалагчийн хяналт тавих байгууллагууд руу албан бичгээр хандаж, өнөөдрийн байдлаар нийт 69 зураг төсөв, ажлын даалгавар хүлээн авч, гурван төсөл, арга хэмжээний зураг төсөв, ажлын даалгаврыг захиалагчид буцаан тендер шалгаруулалтыг зарлаад байна.

Нийслэлийн Засаг дарга бөгөөд Улаанбаатар хотын Захирагч Х.Нямбаатар: “Төсөв батлуулах болохоор төсвөө тавиулах гэж улайрдаг ч ажлаа гүйцэтгэж чадахгүй бол хариуцлагаа хүлээдэг болно. Худалдан авах ажиллагааны эрх шилжүүлэн авсан байгууллагууд шинэ төслүүддээ ямар шалтгаанаар тендер зарлаж чадахгүй байгаагаа тайлбарлаж, он дамжих удаан хүлээгдсэн төслүүдийг гүйцэтгэж чадахгүй бол ажлыг эрэмбэлж буцаан татах хэрэгтэйг хэллээ. 

Мөн техникийн тодорхойлолтоо гаргахгүй, хугацаатай үүрэг даалгавар өгөхөд үүрэг даалгаврыг биелүүлэхгүй бол сахилгын шийтгэл ногдуулдаг системтэй болно. Жишээлбэл, автобус III баазыг барина гээд аль 2018 онд 13 компанид тендерийн ажлыг 13 хувааж өгсөн. Ганц бааз барих гэж 6, 7 жил болж буй цаасны компаниудын гэрээг цуцлуулахыг санууллаа. Цаашдаа ажил авчхаад гүйцэтгэл байхгүй тендерт ахин ордог байдлыг болиулж, хөрөнгө оруулалтын ажлуудыг гацаадаг компаниудыг цэгцэлж, шаардлагатай бол хар жагсаалтад оруулж, худалдан авах ажиллагаанд оруулахгүй” гэдгийг хэллээ.