Moos компанийн угсардаг буюу модульчлагдсан барилгын систем нь үр ашигтай, байгаль орчинд ээлтэй, нийгмийн оролцоог дэмжсэн шийдлээрээ орон сууц эрэлхийлэгчдийн анхаарлыг татаж байна.

Орон сууцны хүртээмжийг өөрчлөн шинэчлэх зорилготой Нидерландын стартап компани нь модульчлагдсан барилгын системээ амьдралд нэвтрүүлж туршиж үзжээ.  

Moos компани нь ирээдүй рүү хандсан дизайн, барилга угсралт, хөгжүүлэлтийн чиглэлд эерэг өөрчлөлт авчрахыг зорьсон мэргэжилтнүүдийг нэгтгэсэн компани юм. Тус компани нь олон салбарыг хамарсан архитектурын студи Concrete-тэй хамтран Нидерландын орон сууцны хямралыг шийдвэрлэх зорилготой бүтээгдсэн модульчлагдсан барилгаа танилцуулжээ.

Нидерланд дахь орон сууцны хямрал нь ноцтой түвшинд хүрээд буйг Deloitte-ийн “Европод амьдрах нь: 2024 орон сууц ба үнэ" тайланд дурдагдаж шинээр баригдаж буй орон сууцны үнэ нь дундаж Голланд хүний жилийн орлогоос 16 дахин их байгаа ба Амстердам зэрэг томоохон хотуудад нийтийн орон сууцанд орох хүлээлтийн хугацаа 20 жил болсныг тэмдэглэжээ.

Эдгээр үзүүлэлтүүд Moos-ийн анхны төсөл болох Moos Euterpe-ийн ач холбогдлыг тодотгож байгаа билээ. Роттердам хотын ойролцоо байрлах нийтийн орон сууцны энэхүү жижиг хороолол нь 2000 квадрат метр талбайг хамрах бөгөөд өөр хоорондоо ижил бус хэмжээтэй 30 орон сууцаас бүрдэх тул багахан гэр бүл болон ам бүл өнөр гэр бүлүүдийг хүлээн авах чадвартай орон сууцын төсөл юм. 

Давхарлан барьсан модулиудыг өөд өөдөөс нь харуулан байршуулж голдоо жижигхэн нийтийн цэцэрлэгтэй байхаар зохиогдсон байна. Барилгын фасадыг хашаалсан нь гадаах орон зайг верандаа болгон хувиргаж. Оршин суугчид тэнд цэцгийн сав, сандал гэх мэтээ тавьж хувийн орон зайгаа тохижуулах боломжийг бүрдүүлж өгчээ.

Байшингийн модуль бүр нь унтлагын өрөө, гал тогоо, угаалгын өрөө зэрэг үндсэн хэрэгцээг хангах хэсгүүдээс бүрдсэн бол хоёр дахь модульд нь оршин суугчдын амьдралын хэв маягт тохируулан өөрчлөх боломжтой уян хатан орон зайг төлөвлөжээ.  

Concrete-ийн төслийн архитектор Иван Хамелеерс хэлэхдээ:

"Барилгын талбай нь урт, нарийн байсан нь тохиромжтой орон сууцны зохион байгуулалтыг олоход хүндрэл учруулсан. Бид хоёр талдаа нээгддэг орон сууцны загварыг зохион бүтээсэн тул оршин суугчдад өргөн, тав тухтай орчин үүсгэж чадсанаас гадна веранда/балконоор дамжин дундын цэцэрлэг рүү гарах боломжийг бүрдүүлсэн. Ингэснээр оршин суугч хооронд байгалийн жамаар харилцаа үүсэх жижигхэн дундын орон зайг бүрдүүлсэн юм. Хэдэн жилийн турш загварын орон сууцанд дизайн, инженерчлэлийн туршилт хийсний эцэст Moos орон сууцны системийн анхны төсөл амжилттай хэрэгжиж байгааг харах үнэхээр сэтгэл хөдлөм сайхан байлаа" гэжээ.

Moos нь тогтвортой хөгжил зорилгодоо хүрэх үүднээс барилга нураалтын дахин боловсруулсан материал болон био суурьтай материалуудыг төслийн барилгууддаа ашигласан нь тун сайшаалтай. Holcim-ийн дахин боловсруулсан бетоноор шалаа цутгаж ламинатлан наасан модоор хануудаа бэхэлсэн нь байгууламжийн бат бөх байдлыг хангаж байна. Түүнээс гадна модон хүрээтэй гурван давхар шилтэй цонх нь эрчим хүчний хэмнэлтийг нэмэгдүүлж байна.

Тус компани нь дээрх төслөөс хойш 500 орчим ийм орон сууцны захиалга авсан бөгөөд "буцаан авах баталгаа" нь орон сууцыг оршин суугчдаас хялбархан хураан авч нүүлгэн шилжүүлэх боломжийг бүрдүүлж байгаа юм. Ингэснээр орон сууцуудыг эрчимтэй эргэлтэд оруулж байгаль орчинд үзүүлэх нөлөөг хамгийн бага түвшинд барих боломжтой байгаа юм.  

 Бичсэн: Петра Лохо
 Зураг авсан: Стийн поэлстра

Орчуулсан: Л.Батбилэг