"Бодь Пропертийз" ХХК нь нийгмийн хариуцлагын хүрээнд МБҮА ТББ-ын хамтран хэрэгжүүлж буй "Дулаан шийдэл II" төсөлд 2 айл өрхийн байшинг бүтэн дулаалах санхүүжилт олгосон. Ингэхдээ Улаанбаатар хотын байшинтай өрхүүдийн дунд нээлттэй шалгаруулалт зарлаж, 10 гаруй шалгуур үзүүлэлтээс хамгийн өндөр үнэлгээ авсан СХД-ийн 22-р хорооны иргэн Г.Хүрэлбаатар болон СХД-ийн 7-р хорооны иргэн Б.Үрлээгийн байшинг тус тус бүтэн дулаалахаар сонгосон юм.

Тус хоёр байшингийн хана, дээвэр, суурь дулаалах, хаалга, цонх солих/сайжруулах ажлыг "Дулаан шийдэл II" төсөлд хамрагдаж, дулаалгын технологид суралцсан Ц.Пүрэв, Ц.Цогт-Эрдэнэ ахлагчтай барилгын бичил, жижиг бизнес эрхлэгчид 2025 оны 2 дугаар сарын 4-18-ны хооронд хийж гүйцэтгэлээ.

Байшинг технологийн дагуу зөв, бүрэн дулаалснаар тухайн айл өрхөд 50 ба түүнээс дээш хувийн эрчим хүчний хэмнэлт үүсэж, тэр хэрээр түлш зарцуулалт багасан, өрхийн эдийн засагт эерэгээр нөлөөлөх, дотор агаарын чанар сайжрах зэрэг боломж бүрдлээ. Ийнхүү 2025 оны 2 дугаар сарын 18-нд дулаалгын ажлын үр дүнг айл өрхүүдэд Бодь Пропертийз ХХК-ийн гүйцэтгэх захирал Б.Тэгшбаяр, МБҮА ТББ-ын гүйцэтгэх захирал Г.Батсүх нар хүлээлгэн өгөв.

Тус хоёр байшинд дулаалахын өмнө “Дулаан шийдэл II” төслөөс дулаан алдагдлыг илрүүлэх зорилгоор камертай хэмжилт хийж, дулааны тав тух болон дотор агаарын чанарыг хэмжихээр өвлийн хэмжилтийн багаж суурилуулаад байна. Мөн сэргээгдэх эрчим хүчний тоног төхөөрөмж суурилуулна. Ийнхүү тодорхой хугацааны дараа үр дүнг хэмжих, мэдээлэх, эрчим хүчний хэмнэлтийн гэрчилгээ гаргах зэрэг ажлыг үргэлжлүүлэн хийж гүйцэтгэнэ.

МБҮА ТББ-ын хамтран хэрэгжүүлж буй “Дулаан шийдэл II” төсөл нь Европын холбооны Свич-Эшиа хөтөлбөрийн санхүүжилтээр эрчим хүчний хэмнэлттэй шийдлүүдийг боловсруулан нэвтрүүлж, хүлэмжийн хийн ялгарлыг бууруулахад хувь нэмрээ оруулан, эрүүл мэнд, эдийн засаг, нийгмийн хувьд үр ашигтай байх зах зээлийг бий болгох зорилготойгоор хэрэгжиж байна.