Европын орнуудын норм стандартыг Монгол Улсын барилгын салбарт нэвтрүүлэх, барилгын чанар, хөрөнгө оруулалтын үр ашгийг дээшлүүлэх евро нормын үүрэг оролцоог судлах, танилцах,  зорилгоор салбарын төрийн болон төрийн бус байгууллагуудын төлөөлөл ХБНГУ, Польш болон Литва улсуудад албан томилолтоор ажилласны үр дүнд Газрын харилцаа,  барилга,  геодези зураг зүйн газар,  Стандарчил, хэмжил зүйн газар болон ХБНГУ-ын стандартчиллын хүрээлэн (DIN)-тэй гурван талт цаашид хамтран ажиллах харилцан ойлголцлын санамж бичигт гарын үсэг зурлаа.

Манай улс Европын холбооны нийтлэг зарчим, хэм хэмжээг төрийн захиргаа, нийгэм эдийн засгийн бүхий л салбар байгууллагуудад нэвтрүүлэх бодлогыг дэвшүүлж, 2010 оны 12 сард Европын холбоо болон Монгол Улсын  хооронд түнш хамтын ажиллагааны хэлэлцээр байгуулж,  2011оны 3 сард Монгол Улсын Засгийн газар, Европын холбооны нийтлэг зарчим хэм хэмжээг нэвтрүүлэх бэлтгэл ажлын төлөвлөгөөг баталсан нь ийнхүү өнөөдөр ажил хэрэг боллоо. 

Төлөөлөгчид айлчлалын явцад Шадар сайд, БХБ-ын сайдтай уулзахаас гадна Газрын харилцаа,  барилга,  геодези зураг зүйн газар, Стандартчилал, хэмжил зүйн газар болон бусад холбогдох байгууллагуудаар зочилох юм байна. 

Өнөөдрөөс эхлэн эрх зүйн хувьд хэрэгжиж эхлэх уг үйл ажиллагааг Монгол Улсын ирээдүйн хөгжил, тэр дундаа  асуудалтай байгаа барилгын салбарт олон олон үр дүнтэй стандарт нормыг нэвтрүүлж чадна гэдэгт албаныхан итгэлтэй байгаа аж.