“Барилгын үйл ажиллагааны тусгай зөвшөөрлийн журам, суурь нөхцөл шаардлагад оруулж буй өөрчлөлт, шинэчлэлт” олон нийтийн хэлэлцүүлэг 2025.02.11-ны өдөр болж, Хот байгуулалт, барилга, орон сууцжуулалтын яамны Төрийн нарийн бичгийн даргыг түр орлон гүйцэтгэгч С.Төмөрхүү, Барилгын материалын хэлтсийн дарга Д.Батзориг, Монголын Барилгын Үндэсний Ассоциаци ТББ-ийн Гүйцэтгэх захирал Г.Батсүх нар оролцож мэдээлэл хүргэлээ.

Тус хэлэлцүүлгээр Барилгын ерөнхий хуулийн (Шинэчилсэн найруулга)-ын төсөл, Барилгын үйл ажиллагааны тусгай зөвшөөрлийн нөхцөл, шаардлагад оруулж буй өөрчлөлт, шинэчлэлтийн талаарх мэдээллийг хүргэж, “Барилгын хөгжлийн төв” ТӨҮГ-ын удирдлага, албан хаагчид болон төрийн бус байгууллагууд, иргэд, аж ахуйн нэгжийн төлөөллүүд оролцож санал солилцлоо.

Барилгын салбарын нэг онцлог нь 2018 оноос эхлэн төр, хувийн хэвшлийн түншлэлийн хүрээнд Монголын Барилгын Үндэсний Ассоциаци ТББ, Барилгын Материал Үйлдвэрлэгчдийн Холбооноос барилгын материалын үйлдвэрлэлийн тусгай зөвшөөрөл олгодог болсон. Гэсэн ч Барилгын материалын болон барилга угсралт, барилгын үйл ажиллагааны тусгай зөвшөөрлийг авахын тулд маш олон шат дамжлагыг дамжих шаардлагатай тулгарч байна. 

Бичиг баримтуудыг цахимаар илгээдэг ч цаана нь боловсруулалт хийхдээ үйл явц нь хүний гараар дамждаг. Тухайлбал: Монголын Барилгын Үндэсний Ассоциаци ТББ цахимаар ирсэн бичиг баримтыг хүлээж аваад 7 хоногийн дотор хариу өгнө, ИТА ажилтан давхцалтай бол БХТ ТӨҮГ-руу хандаж давхцалыг арилгах хүсэлтийг хүргүүлж, давхацсан компаниасаа ажлаас халагдсан тушаал авч хасалт хийлгэн БХТ- ТӨҮГ руу дахин хүргүүлээд давхцалыг арилгуулаад МБҮА ТББ руу хандаж баталгаажуулсны дараа яам руу бичгээр саналаа илгээдэг. Ирсэн хүсэлтийг яамны мэргэжилтэн, газрын дарга нар хянаад, сайдын тушаал гаргадаг. Гаргасан тушаалын дагуу гэрчилгээн дээр бичилт хийгээд яам руу хүргүүлээд, сайд гарын үсэг зурж баталгаажуулаад МБҮА ТББ руу хүргүүлдэг. Үүний дараа ААН-тэй гэрээ байгуулж тусгай зөвшөөрлийн гэрчилгээг олгодог. Гэрээний дагуу тусгай зөвшөөрөл эзэмшигч байгууллага нь БХТ ТӨҮГ-т тайлангаа өгдөг.

ХББОС-ын сайдын 2025 оны 2 сарын 10-ны 55 тоот тушаалаар 2021 оны БХБ-ын сайдын 147, 225 тоот тушаалууд хүчингүй болж өмнөх Барилгын үйл ажиллагааны тусгай зөвшөөрлийн журам, суурь нөхцөл шаардлага хүчингүй болж байна.

Иймд нэн яаралтай Барилгын үйл ажиллагааны тусгай зөвшөөрлийн суурь нөхцөл шаардлагыг шинэчлэн баталж тусгай зөвшөөрөл олгох үйл ажиллагааг хэвийн явуулах нөхцөл байдал үүсэж байна.

Барилгын үйл ажиллагааны тусгай зөвшөөрөл авахад МБҮА-БХТ-ХББОСЯ-МБҮА-БХТ гэсэн ойлгомжгүй төөрөгдөлд орохоор шат дамжлагыг бууруулж аж ахуйн нэгж байгууллагуудад ойлгомжтой, тодорхой, хялбар болгох нэн шаардлагатай байна.