Сочи хот 2031 он гэхэд анхны хиймэл аралтай болохоор төлөвлөж байна. Энэхүү төсөл нь жуулчлалын шинэ бүс байгуулах зорилготой бөгөөд 2026 оноос барилгын ажил эхлэхээр төлөвлөжээ. 

Хиймэл арал нь Мацеста станц, Сталины зуслангийн эсрэг талд байрлах бөгөөд 50 га талбайг далайгаас хамгаалах гидро байгууламжийг эхлээд босгох юм байна. 

Нийт төсөл 150 га талбайг хамрах бөгөөд 1 их наяд рублийн хөрөнгө оруулалт шаардагдана. Арал дээр зочид буудлын цогцолбор, спорт, зугаалгын бүсүүд, театр, концертын тайз, Хар далайг судлах төв зэрэг байгууламжууд баригдах юм байна. 

Хиймэл арлын зураг төслийн ажлыг эхлүүлсэн бөгөөд анхны хувилбарыг танилцууллаа. Төсөлд зарцуулсан нийт өртгөө ойролцоогоор 12 жилийн дотор нөхөгдөх тооцоотой байгаа аж.