Та минь ээ. Энэ Э.Бат-Үүл дарга чинь далдын хар малгай өмсчихсөн юм биш биз. Саяхан 80 гаруй  зөвшөөрөлгүй барилгуудыг илрүүлж олон нийтэд зарласан бол одоо зөрчилтэй байгаа 30 гаруй  шатахуун түгээх станцыг  мөн адил илрүүлсэн гэнэ. Энэ хотод ер нь зөв зүйтэй юм байна уу?

 Үнэхээр л Э.Бат-Үүл дарга ид шид ашиглаад байна уу,  хууль бус үйлдлүүдийг харсан ч хараагүй юм шиг нүдэн балай, чихэн дүлий өнгөрсөн хотын хуучин удирдлагуудын балаг уу гэсэн хоёр асуулт гарч ирж байна. Ер нь очиж, очиж хамгийн сүүлийнх нь үнэнд ойртож байгаа юм.  Хэрэв Э.Бат-Үүл дарга ид шидтэй байсан бол хотын даргаар биш “үзмэрч”-р ажиллаж байх байсан. Магадгүй “ Ванга” эмээ шиг нэрд гарах байсан биз.  Манайхан юм хийсэн хүнийг муулж, элдэвээр хэлдэг нь  гэм биш зан. Хууль бус зүйлүүдийг илрүүлсэн нь Үүл даргын гавьяа. Энэ бүхэн  ирээдүйд л хэрэгтэй.

Хулгайч хүн өөдөлдөггүй шиг, хуульгүй төр өөдлөхгүй нь лав. Тэгвэл монголын тэргүүлэх салбарт тооцогдоод байгаа барилгын салбарынхны энэ олон зөвшөөрөлгүй барилгуудыг нураавал хэн хариуцлагыг нь хүлээх вэ?
Гээнэдээч бий, гоондооч бий гэдэг шиг. Дан ганц барилгын салбарынхны буруу гэж бодохгүй л байна. Буруу бүхнийг илрүүлж улс орныхоо төлөө хоёргүй сэтгэлийг өвөрлөн яваа Үүл даргын ч буруу гэж бодохгүй байна. Тэгвэл хэний буруу вэ? 

“Ижий минь цагийн сайхан гунхсан хүүхэн байсан юм, ийм болгосон хүн нь би байна” гэж  ээжийн тухай нэгэн шүлгэнд өгүүлдэг шиг “Цагийн сайханд хот минь  Азийн цагаан дагина байсан  юм. Балгас болгосон хүн нь би байна” гээд хариуцлагаа хүлээгээд гараад ирэх өмнөх хотын даргуудыг хармаар байна. Аливаа юмны эхлэлийг нь буруу тавьбал цаашдаа ч буруу болоод явчихдаг.
Ундаргыг нь урсгасан хүмүүс одоо хаана байна вэ.  Бид өмнөх удирдлагуудаас  Улаанбаатар хотынхоо амийг нэхмээр байна. Хүнтэй зүйрлэвэл энэ хот чинь сэхээн амьдруулахын тасагт хиймэл амьсгал хийлгээд, амь тариа угсруулаад хэвтэж буй хүнтэй ив ижилхэн байна. Ийм болгосон хүн нь хэдэн төгрөг халааслаад хаа сайгүй зугаалж байна.

Тэдний адил Үүл даргын ам мөнгөөр үдүүлэхгүй л байгаасай гэж бодох юм.  Хууль бус гэж тооцогдоод байгаа хохирлын хэмжээг  өмнөх удирдлагуудаас гаргуулах хэрэгтэй. Хураасан мөнгийг нь хуу хамах хэрэгтэй байна.
Ерөнхийлөгч байсан хүнээ шүүж шоронд хийж чадсан юм чинь тэднийг шүүх нь юу ч биш байлгүй дээ. Харин одоо эдээ бээрийг нь  шахаж цэвэрлэж байгаа Э.Бат-үүл даргыг энэ тэндгүй үзэн ядаж байна. Энэ бол зөв үзэл санаа биш.  Бид ирээдүйгээ бодож  “цагаан толгойт” баатрыгаа харин ч бүр дэмжиж, хайрлах  хэрэгтэй.

Энэ хотыг ийм байдалд хүргэсэн эрхмүүдийг индэр дээр дуудаж, явсан замаа эргээд нэг харж хариуцлагаа хүлээхийг хүсч байна.

                                                                                                                                                                                                          Л.Мөнхчимэг