Өчигдөр барилга хот байгуулалтын яаманд  барилгын салбарынхны уулзалт болж өнгөрлөө. Сайдтай уулзсан тус уулзалт барилгын салбарт өрнөж буй өнөөгийн байдал, цаашдаа юун дээр анхаарч, хэрхэн ажиллах тухай голчилон ярилцлаа.

Тус салбарт 40,50 жил ажилласан ахмад буурлуудаас  эхлээд шинэхэн мэргэжилтнүүд цугласан уг  уулзалт  үр дүнтэйгээр 2 цаг гаруй үргэлжилсэн юм. 

Барилгын норм дүрэм, аюулгүй ажиллагаа, ажиллах хүчин, барилгын чанар, зөвшөөрөл, барилгачдын нэр хүндийн талаар чөлөөтэй санаа бодлоо солилцож, шинэчилсэн засгийн газар гэж нэрлэсэнчилэн барилгын салбарт ч шинэчилэл, өөрчлөлт, анхаарал халамж, хэрэгтэй байгааг дахин дахин сануулж байлаа.

Эдийн засагч хүний нүдээр, ойр ажиллаж байсан хүний нүдээр харж, эзэнгүй шахам явж байсан энэ салбарыг ирээдүйтэй, нэр хүндтэй, чанар, чансаатай авч явахыг сайдад хүсч байлаа. Ямартай ч барилгын салбарынхан уулзаж сайн муугаа ярилцлаа.

Иймээс сайд Ц.Баярсайхан оновчтой, дорвитой шийдвэрүүдийг гаргаж, өргөн цар хүрээтэй энэ салбарыг өндөрт өргөн авч явна гэдэгт итгэж байна.