Суурин иргэншилтэй хүн төрөлхтний хөгжлийг барьж босгосон барилга хийгээд түүнийг дагасан бүтээн байгуулалтаас нь таньж болно. Учир нь нийгмийн бүхий л үйл ажиллагаа ямар нэгэн барилга байгууламжин дотор л өрнөдөг билээ. Монголчуудын хувьд дан ганц нүүдэлчин ахуй цагаасаа л барилга байгууламжийг өөрсдийн хэв маяг, өнгө төрхтэйгээр бий болгож ирсэн төдийгүй, үндсэндээ 1990 оноос хойш барилгын салбар улс орны тэргүүлэх салбар болтлоо хөгжсөн гэж мэргэжилтнүүд үздэг. 

  Гэтэл энэ цаг үед ажлын хариуцлага алдсан, хувийн эрх ашгийг дээгүүрт тавьснаас болж нийгэмд ноцтой хохирол учруулсан цөөн хэдэн хүний бурууг Монголын нийт барилгачдад үүрүүлж, хэвлэл мэдээллээр энэ мэт тэнцвэргүй мэдээлэл тарааж байгаа нь хэн хүний дургүйцлийг хүргэж байна.  Тиймээс өнөөдөр барилгын салбарт үүсээд байгаа буруу ташаа ойлголтыг  бусдад зөв талаас нь ойлгуулж, ажлаа хийж чадахгүй, хариуцлага алдсан нэгэн байхад улс эх орны бүтээн байгуулалтын төлөө чин хүсэл, амжилт бүтээлтэй ажиллаж яваа компаниуд хавьгүй илүү байгаа гэдгийг бид эрүүл саруул ухаанаар харах цаг болжээ.

  Нийгэмд үүсээд байгаа эдгээр асуудлын талаар үнэн зөв мэдээллийг хүргэх үүднээс өнөөдөр БМҮХолбооны дэд Ерөнхийлөгч Ч.Баатарсүрэн, “Барилга.мн”, БЗМТөвийн захирал Г.Батсүх, “Ган хийц” ХХК-ийн ерөнхий захирал Даваасүрэн, МҮХАҮТанхимын барилга, дэд бүтцийн зөвлөлийн дарга Чимэд-Очир, БҮЭХолбооны Ерөнхийлөгч Батцогт нарын албаны хүмүүс сэтгүүлчдэд мэдээлэл хийлээ. 

  Тус хэвлэлийн хурал бүхий л хэвлэл мэдээллийн байгууллагуудыг хамарсан өргөн цар хүрээтэй томоохон хурал болсон нь цаг үеэ олсон, олон нийтийн хүсэн хүлээж байсан үйл ажиллагаа болсныг харууллаа. Нөгөө талаар барилгачид, салбарын гавьяат ажилтнууд олноор ирсэн нь барилгын салбарын нэр хүнд иргэдийн ташаа ойлгож байгаачлан тэгтлээ уначихаагүй гэдгийг илтгэж байв.

  Хуралд оролцсон төлөөлөгчид шинэ Засгийн газрын бодлого, хотын удирдлагын санаачлагыг дэмжиж байгаа ч барилгын салбарын үйл ажиллагааг зогсонги байдалд оруулахгүйгээр асуудлыг шийдвэрлэх хэрэгтэй гэдэг байр суурийг нэгэн дуугаар илэрхийлсэн юм.

  Барилгын зөвшөөрлийг зогсоосноос хойшхи гурван сарын хугацаанд 12.800 гаруй барилгачин ажилгүй болж, барилга дагасан олон үйлчилгээ, жижиг бизнес зогсонги байдалд орж, улмаар барилгын компаниуд арилжааны банкуудаас авсан 800 орчим тэрбум төгрөгийн зээлийн эргэн төлөлтөд саад учирч байгаа зэрэг олон сөрөг үр дагавар үүсээд байгааг онцоллоо. Хэрэв байдал энэ янзаараа удаан үргэлжилбэл арилжааны банкууд 2009 оны хямралын үеийнх шиг хүнд байдалд орж мэдэхээр байгааг ч дурдсан юм.

  Иймээс хууль зөрчсөн, хариуцлага алдсан компаниудад хариуцлага тооцож, дүрэм журмаараа яваа компаниудад үйл ажиллагааных нь зөвшөөрлийг олгож, барилгын салбарыг гацаанаас гаргахыг холбогдох  байгууллагуудад хэвлэл мэдээллийн хэрэгслээр дамжуулан уриаллаа.

Х.Болормаа