Барилга барих зөвшөөрөл авна гэдэг  барихаасаа ч илүү хугацаа шаарддаг ажил  гэдгийг БХБ сайд нь ч, Нийслэлийн засаг дарга нь ч, ер нь аль аль талдаа ойлгосон бололтой.

1990 -ээд оноос хойш хойд эцгийн царай харсан жаал шиг төрийн албаныхны хүнд суртал, хээл хахууль, хууль бус үйлдлийн дор 120 гаруй гарын үсэг зуруулах гэж далд хэлбэрээр дарамтлуулж ирсэн энэ салбарыг дуртай нь муулж бас сайлж ирсэн.

Саяхны болсон харамсалтай үйл явдлуудын дараа барилгын салбарыг хүн бүхэн буруутгаж, бүх зүйл нь болж бүтэхээ байсан мэтээр мэдээлсэн. Гэвч энэ үйл явдлууд далд бугшсан буруу зуршлыг ил гаргаж ирсэн юм.

 Ингэснээр энэ бүхэн дан ганц барилгын салбарынхны буруу биш төрийн өөрийнх нь буруу болж хувирсан юм. Өөрөөр хэлбэл  булагийн адагт нь биш булагийн эхэнд нь учир байсныг тогтоосон.
БХБ яам, нийслэлийн засаг даргын тамгийн газар, ерөнхий сайдын санаачлагаар томилогдсон гишүүд барилга барих зөвшөөрөл, барилгын аюулгүй ажиллагаа, норм стандарт, төрийн шударга оролцоо зэрэг дээр анхаарлаа хандуулан ажиллаж байна.

 Өнөөдөр Нийслэлийн засаг дарга Э.Бат-Үүл барилгачдын төлөөллийг хүлээн авч уулзаад төрийн хүнд суртал, дарамт шахалтыг арилгаж барилгачид нэг цонхны үйлчилгээгээр үйлчлүүлж, зардал чирэгдэлгүй, шударга үнэн тогтолцоогоор үйлчлүүлж,  төр нь иргэндээ саад болох биш, төр нь иргэндээ үйлчилэх тэр  системийг бий болгох тухай ярилцаж, барилгачдын санаа бодлыг сонслоо.  Зөвшөөрөлгүй гэж нэрлэгдээд олонд зарлагдсан 80 гаруй барилгад нарийн шалгалт хийхэд “Авзага трейд”, “Тэмүүлэн баатар” гэх хоёр компани л ямар ч зөвшөөрөлгүй барилга барьсан нь тогтоогджээ. Энэ хоёр барилгын нураах арга хэмжээ авна гэлээ.

Ийнхүү барилгын компаниудын эзэд “Хүрээ гэж хол юм, хүний амь гэж бөх юм” гэж үглэсээр олон давааг давдаг цаг ашгүй ард үлдэх нь.