Өчигдөр Хэнтий аймгийн Өндөрхаан хотод хүүхдийн хоёр шинэ цэцэрлэг  хаалгаа нээлээ. Цэцэрлэгийн нээх үйл ажиллагаанд БСШУ-ны сайд Ё.Отгонбаяр, УИХ-ын гишүүн Н.Ганбямба, Б.Бат-Эрдэнэ, Хэнтий аймгийн Засаг дарга Ч.Эрдэнэбаатар нар оролцов. Энэ жил Хэнтий аймгийн хэмжээнд нийт 450 хүүхэд хүмүүжих 5 цэцэрлэгийн барилга шинээр баригдан ашиглалтанд орж байна. Энэ удаад тус бүр 100 хүүхэд хүмүүжих  2 цэцэрлэгт нээлтээ хийсэн ба нийт 34 ажлын байр шинээр бий болжээ. Уг цэцэрлэгийн барилгуудыг УИХ-ын гишүүн Н.Ганбямба нийт 840 сая төгрөгөөр санхүүжүүлж, канад модон технологиор барьсан. Барилгынхаа хажууд авсаархан халаалтын зуухтай бөгөөд халуу дүүгэсэн орчинд бяцхан хүүхдүүд сурч хүмүүжиж байна.

      Хоёр цэцэрлэгийн үйл ажиллагаанд зориулж сайд тоглоом бэлэглэсэн бол УИХ-ын гишүүн Б.Бат-Эрдэнэ хувиасаа тус бүрт нь 500 мянган төгрөг гардуулж, аймгийн Засаг дарга Ч.Эрдэнэбаатар тус бүрт нь 1 сая төгрөгийн дэмжлэг үзүүллээ. Цэцэрлэгүүдийн нээлтийн дараа Ё.Отгонбаяр сайд Өндөрхаан хотын сургууль, цэцэрлэгийн багш нартай уулзалт хийж Яамнаас хэрэгжүүлж байгаа ажлыг товч танилцуулж, багш нарын санал хүсэлтийг сонссон байна.