Монгол Улсын Засгийн газраас 2010 онд баталсан 149 дүгээр тогтоолд төрийн өмчит таван их сургуулийг эхний ээлжинд нүүлгэн шилжүүлэхээр тусгасан. Үүний дагуу Улаанбаатар хотоос 45 километр зайд орших Шивээтийн хөндийн 2000 га газарт иж бүрэн хотхон барихаар шийдвэрлэсэн юм. Нийт 150 мянган хүн амьдрахуйц энэхүү хотхоныг барих ажил ирэх оны зургаадугаар сард эхлэх байсан ч судалгааг нь дутуу хийснээс дахин нягтлахаар болжээ. Үүнээс гадна Шивээтийн хөндийгөөс их хэмжээний нөөц бүхий нүүрсний орд, алтны судаг илэрсэн аж.

     Боловсрол, соёл, шинжлэх ухааны сайд Ё.Отгонбаяр энэ талаар “Засгийн газраас баталсан үндсэн чиглэлээр бол хотхон байгуулахад наанадаж 10 жилийн хугацаа хэрэгтэй. Оюутны хотхоны ажил эхлэхэд хэд, хэдэн хүчин зүйлүүдийг бүрдүүлсэн байх шаардлагатай. Үүнд хамгийн чухал нь санхүүгийн асуудлыг шийдвэрлэх явдал юм. Албаны хүн “ Ерөнхий сайдыг БНХАУ-д айлчлах үеэр Хятадын нэг банкнаас дэд бүтцийг нь санхүүжүүлэхээр болж, санамж бичигт гарын үсэг зурсан. Одоо зураг төслийн ажил эхлэх гэж байна. Харин  газрын тухайд Ерөнхий сайдаас өгсөн чиглэлийн дагуу Улаанбаатар хотын Налайх дүүргийн Шивээтийн хөндийд 2000 га газар олгосон. Газар олгосны дараа шинжилгээ, судалгааны ажил хийгддэг. Мөн биднээс шалтгаалахгүйгээр нэлээд бэрхшээлтэй асуудлууд үүсэж байгаа. Үүнийг дахин нягтлах хэрэгтэй” гэсэн юм. Үнэхээр ч энэхүү шинэ бүтээн байгуулалтыг өрнүүлэх ажлын ар талд олон хүндрэл үүсээд буй аж. Тухайлбал, Үндэсний хөгжил шинэтгэлийн хорооноос “Судалгаанд тулгуурласан, нухацтай зүйл дээр бид ажиллах ёстой” хэмээж, бусад багийнхныхаа  эсрэг зогсох болсон гэнэ.