“Монгол базальт” ХК нь байгалийн цэвэр түүхий эдээр хүний эрүүл ахуйд хоргүй, эрчим хүчний хэмнэлтийг бий болгосон “ногоон” бүтээгдэхүүн үйлдвэрлэж, Монгол улсын барилгын салбарт нэгэн шинэ дэвшлийг бий болгож чадсаныг төр засаг үнэллээ. Монголын барилгын салбар эрчимтэй хөгжиж, түүний дагалдах салбарууд ч үйл ажиллагаагаа өргөтгөж, дэлхийн стандартад нийцсэн техник болон технологийн шинэ шийдэл инновацийг үйлдвэрлэлд нэвтрүүлж байгаа нь  энэ салбарын амжилт юм.

Манай улс барилгын дулаалгын сайн чанарын бүтээгдэхүүнийг зөвхөн импортлогч байсан үе ард хоцорч үндэсний хэмжээнд “Монгол базальт” ХК дотооддоо үйлдвэрлэж байна. Байгалийн чулууг хайлуулан хийдэг өндөр технологи шаардсан бүтээгдэхүүн үйлдвэрлэж, шинжлэх ухаан технологийн патентийг үйлдвэрлэлд нэвтрүүлснийг үнэлэж  Монгол Улсын Засгийн Газар тус компанийн захирал Л.Ариунболдыг “Шилдэг зохион бүтээгч”-ээр тодруулсныг Шадар сайд Н.Алтанхуягийн харья “Монголын оюуны өмчийн газраас хүндэтгэлтэйгээр гардууллаа.

Үндэсний үйлдвэрлэгчдийн чадамж дээшилж, дэлхийн хэмжээнд өрсөлдөх өргөн боломж бий болсоныг энэ үйл явдал гэрчиллээ.