Барилгын салбарын төрийн болон төрийн бус байгууллагууд салбарт үйл ажиллагаа явуулж байгаа аж ахуйн нэгж, компаниудын харилцаа холбоог сайжруулах, төрийн байгууллагуудын зарим чиг үүргийг төрийн бус байгууллагуудад шилжүүлэх талаар яригдаад багагүй хугацаа өнгөрч байна.

    Төрийн зарим чиг үүргийг ТББ-уудад шилжүүлэх, хамтран ажиллах талаар Засгийн Газар 93-р тогтоолыг 2008 онд гаргаж хамтран ажиллах тухай гэрээ байгуулсан. Мөн энэ хамтын ажиллагааны үйл явцыг түргэсгэх, эрх зүйн орчинг нь хянах зорилготойгоор ерөнхий сайдын 2010 оны 06 сарын 30-ны 60- р тогтоолоор ажлын хэсэг байгуулан ажиллуулж “Төрийн зарим чиг үүргийг гэрээний үндсэн дээр ТББ-аар гүйцэтгүүлэх чиглэл баримтлан ажиллахыг тухайн асуудал эрхэлсэн ЗГ-ын гишүүдэд даалгасугай” гэсэн заалт бүхий 325-р тогтоолыг гаргасан байна. Гэсэн ч өнөөдрийг хүртэл энэ хамтын ажиллагааны гэрээ хэрэгжсэнгүй.

     Өнөөдөр Монгол улсын хэмжээнд 13307 төрийн бус мэргэжлийн холбоод үйл ажиллагаагаа явуулж байгаагаас 2008 онд ХЗДХЯ-нд бүртгэлтэй 9352, 2009 онд УБЕГ-т бүртгэлтэй 3955 ТББ-ууд байгаа гэсэн судалгаа гарсан бол 2011 онд 116 төрийн бус байгууллага УБЕГ-т үйл ажиллагааны тайланг хүргүүлсэн гэсэн тоон мэдээлэл гарчээ. Үүнээс харахад ТББ-ууд Төрийн зарим чиг үүргийг гүйцэтгэх хэмжээний чадвартай гэдгийг барилгын салбарын төлөөлөх байгууллагууд үзэж байгаа юм.

     Гэвч ЗТБХБЯ-ны сайдад хаягласан ТББ-уудад хариуцуулах тусгай зөвшөөрлийн жагсаалттай танилцаж үзээд 2011 оны 03 сарын 29-ны өдөр гаргасан шийдвэртээ Барилга байгууламжийн зураг төсөл боловсруулах, Барилгын ажил гүйцэтгэх, Өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх тусгай зөвшөөрөл олгох эрхийг ТББ-д хариуцуулах нөхцөл бүрдээгүй гэсэн шийдвэрийг гаргажээ.

    Урьд өмнө нь гаргаж байсан шийдвэрээ харгалзан үзэлгүй татгалзсаны шалтгаан нь төр хувийн хэвшлийн хоорондын харилцан ойлголцлол хангалттай түвшинд хүрээгүй, ТББ болон мэргэжлийн холбоодын ялгаа, гүйцэтгэх үүргүүдийг тодорхой заасан эрх зүйн орчин бүрдээгүй, Төр ТББ хоёрын байгуулсан гэрээний үндсэн дээр ТББ-аар гүйцэтгүүлэх ажлын санхүүжилтын механизм нь тодорхой биш гэсэн шалтгаантай татгалзсан байна.

     Уг нь Төрийн байгууллагуудын чиг үүргийг ТББ-д шилжүүлж хариуцуулсан тохиолдолд барилгын салбарын аж ахуйн нэгж, компаниуд төрийн байгууллага хоёрын хоорондын харилцаа холбоо хангалттай түвшинд хүрэх боломж нь бүрдэх юм.   

 

Төрийн зарим чиг үүргийн мэргэжлийн холбоодод шилжүүлэх чиглэлээр тулгамдсан асуудлууд шийдвэрлэх арга зам PRESENTATION татаж авах.