Бетон зуурмаг үйлдвэрлэгч “Ремикон” ХК нь ирэх онд Монголдоо томоохонд тооцогдох Цементийн үйлдвэр барих гэж байна.

Тус цементийн үйлдвэр нь жилд Портланд 42.5 маркийн 300 мянган тонн цемент үйлдвэрлэх хүчин чадалтай. Хүчин чадлаараа Хөтөлийн цемент шохойн үйлдвэрийн дараа бичигдэх төдийгүй импортын цементийг орлож, жилээс жилд нэмэгдэж буй цементийн хомсдлийн тодорхой хэсгийг хангаж чадах үйлдвэр юм.

“Ремикон” ХК нь цементийн үйлдвэр барих хөрөнгө оруулалтаа нэмэлт хувьцаа гаргах замаар татан төвлөрүүлэхээр Санхүүгийн зохицуулах хорооноос зөвшөөрлөө авчээ. Санхүүгийн зохицуулах хороо “Ремикон” ХК-ийн нэмж гаргах нийт 39 сая ширхэг нэмэлт хувьцааг, 190 төгрөгөөс доошгүй үнээр, хаалттай хүрээнд гаргахыг зөвшөөрсөн байна.

Уг үйлдвэр баригдсанаар “Ремикон” ХК нь барилгын салбарт барилгын материалын түүхий эд /цемент/-ээс эхлэн эцсийн бэлэн бүтээгдэхүүн /бетон зуурмаг/ үйлдвэрлэж, талбай дээр хүргэж, цутгах цогц үйлдвэрлэл, үйлчилгээ үзүүлдэг анхны үйлдвэрлэгч болж чадах юм. Тиймээс цементийн үйлдвэр ашиглалтанд орсноор компанийн борлуулалт 80-100 хувь өсөх боломж бүрдэнэ.

“Ремикон” ХК болон хувьцааны талаар тодруулбал: “Ремикон” ХК нь Монголын 2 дахь том бетон зуурмагийн үйлдвэр бөгөөд үйлдвэрлэлийн хэмжээ нь 2010 онд 5.2 дахин, 2011 онд 2.3 дахин өссөн бол компанийн ашиг 2010-2011 онд 2 дахин нэмэгдсэн байна.

“Ремикон” ХК нь 2008 оны 5-р сард Монголын хөрөнгийн биржид дээр хувьцаагаа олон нийтэд санал болгон амжилттай арилжаалсан юм. Тус компанийн Ремикон хувьцаа нь 2011 онд Монголын хөрөнгийн биржийн ТОП-20 индексийн сагсад багтсан төдийгүй өнөөдрийн байдлаар 2011 оны хамгийн идэвхитэй арилжаалагдаж буй хувьцаа болоод байна. Өнгөрсөн 10-р сард 2.5 сая ширхэг арилжаалагдсан бол 11-р сард 7.9 сая ширхэг арилжаалагдсан байна. Мөн Ремикон хувьцаа нь энэ оны 1-р сарын 2-нд 72 төгрөг байсан бол 12-р сарын 7-ны байдлаар 190 төгрөг болж, 2.6 дахин буюу 260 хувиар өссөн байна. Энэхүү өсөлтийг мэргэжлийн байгууллагуудын шинжээчид тогтвортой өсч буй компанийн үйл ажиллагаа болон цементийн үйлдвэр барихаар гаргаж буй нэмэлт хувьцаатай холбон тайлбарлаж байна.