“Шинэ бүтээн байгуулалт дунд хугацааны зорилтот хөтөлбөр”-ийн хүрээнд хэрэгжиж буй “100 мянган айлын орон сууцны төсөл”-д зөвлөх үйлчилгээ үзүүлэхээр БНСУ-ын “LH” корпораци болон түүнтэй хамтран ажилладаг Дунг Ил консальтанг компанийхан манай улсад долоо хоног ажиллаа. Энэ ажлынхаа хүрээнд өнгөрсөн пүрэв гаригт Дэлхийн банкны Дэд бүтцийн асуудал хариуцсан ахлах мэргэжилтэн Жим Райкерт, Азийн хөгжлийн банкний мэргэжилтэн Шейн Розентал нартай уулзсан юм. Уулзалтын эхэнд БНСУ-ын “LH“ корпораци болон Дунг Ил консальтангийнхан “100 мянган айлын орон сууц хөтөлбөр”-т зөвлөх үйлчилгээ үзүүлж байгаа төдийгүй энэ хугацаандаа олон улсын стандартад нийцсэн ТЭЗҮ боловсруулж, санхүүжилтийн асуудлыг шийдэхэд Дэлхийн банкны зүгээс ямар төсөл хөтөлбөрт хамрагдаж болох талаар харилцан санал солилцлоо. Дэлхийн банкны мэргэжилтэн Жим Райкерт, Шейн Розентал нар өөрийн байгууллагуудад ямар төсөл, хөтөлбөр  хэрэгжиж байгааг танилцуулсан юм. Мөн энэ үеэр “Та бүхний хийж буй ажлын талаар сонсоход таатай байна. Манай байгууллагад яг ийм төрлийн төсөл хөтөлбөр хэрэгждэггүй. Харин гэр хорооллын зам, дэд бүтэц, хогийг ангилан ашиглах зэрэг төсөл хөтөлбөрийг хэрэгжүүлж байна. Хэдийгээр танай төслөөс өөр боловч “100 мянган айлын орон сууц хөтөлбөр” хэрэгжихэд тус дөхөм болж байгаа гэдэгт итгэлтэй байна. Дэлхийн банк нь Монгол Улсын Сангийн яамтай шууд харилцаатай ажилладаг. Хэрэв танай харилцагч байгууллага тус яаманд өөрсдийн хийж буй ажил нийгэмд ямар чухал болох талаар санал хүсэлтээ илэрхийлж, хүлээн зөвшөөрүүлж чадсан тохиолдолд бид энэ төсөлд анхаарлаа хандуулж болох юм. Бас бага хэмжээний төслийг Дэлхийн банк өөрсдийн дотоод хөрөнгөөр шийдвэрлэх боломжтой” хэмээн байр сууриа илэрхийлсэн юм. Харин БНСУ-ын төлөөлөгчид энэ уулзалтын үеэр жижиг төслийн хязгаар хэчнээн ам.долларт хэрэгждэгийг лавлаж, өөрсдийн зүгээс тэр төсөлд материалаа бүрдүүлэн өгөх сонирхолтой байгаагаа илэрхийлсэн юм.

Дашрамд сонирхуулахад, “100 мянган айлын төсөл хөтөлбөр”-т зөвлөх үйлчилгээ үзүүлэх БНСУ-ын “LH” корпораци нь газар чөлөөлөлт, хотхон хорооллыг зөв зохистой шийдвэрлэсээр ирсэн төрийн өмчит байгууллага. Тэд БНСУ-ын хэмжээнд 3 сая хотхон хорооллын төсөл хөтөлбөрийг амжилттай хэрэгжүүлсэн юм.