"Зуун мянган айл" орон сууц хөтөлбөрийн талаар Хот байгуулалтын төлөвлөлтийн хэлтсийн дарга Ц.Баяртай ярилцлаа.

-Иргэдэд хүлээлт үүсгэж байгаа 100 мянган айлын орон сууцны ажил ямар шатанд явна вэ?
-Нийслэл дэх хөрс, агаарын бохирдол байх ёстой хэмжээнээсээ хэтэрчихээд байгаа. Үүнээс гарах гарц бол тохилог орон сууцны хороолол бий болгох явдал. Улаанбаатарт үүсээд байгаа төвлөрөлийг сааруулж, шинээр хотхон хороололуудыг бий болгох зорилгоор засгийн газраас 100 мянган айлын орон сууц хөтөлбөрийг өнгөрсөн оноос хэрэгжүүлж эхэлсэн. Хөтөлбөрийн хувьд 2010-2012 он 2013-2016 он гэсэн үе шаттайгаар хэрэгжинэ. Энэ оны байдлаар 100 мянган орон сууцны хөтөлбөрт хамрагдах хорооллол, орон сууцны хотхон барилгуудын төслийн урьдчилсан шалгаруулалт хийгдсэн. Тус ажлыг орон сууцжуулах үндэсний хороо, ЗТБХБЯ хамтран хийсэн. Сонгон шалгаруулалтыг энэ оны есдүгээр сарын 10-аас аравдугаар сарын 27 хүртэлх хугацаанд зохион байгууллаа.

-Төслийн урьдчилсан шалгаруулалтад нийтдээ хэдэн байгууллага оролцож, ямар үр дүнд хүрэв?
-Хоёр үе шаттайгаар явагдсан төслийн сонгон шалгаруулалтад 203 байгууллага, 160 гаруй орон сууцны төслийн санал ирсэн. Эхний ээлжинд баригдах орон сууцны барилгуудын болон, хорооллын төслийн жагсаалтыг засгийн газрын 341-р тогтоолоор батлуулаад байна. Тус тогтоол нь зөвхөн төслийг баталсан төдийгүй орон сууцны ажлыг эрчимжүүлэх талаар заалтууд тусгагдсан тогтоол болсон. Батлуулсан төслийн дагуу үндсэн хоёр бүс болох Улаанбаатар хот, бүсийн тулгуур бүс болох аймгийн төвүүдэд баригдахаар байгаа.

-Батлуулсан төслийн хүрээнд эхний ээлжинд Улаанбаатарт болон орон нутагт хэдэн мянган орон сууц баригдахаар болсон бэ?
-Нийтдээ 54 компанийн 68 мянган айлын сууц 2011-2013 онд Улаанбаатарт баригдана. Харин аймаг орон нутгийн хувьд 10600 гаруй айлын орон сууц баригдана гэсэн тооцоо байгаа.

-Иргэд ямар шаардлага хангаж байж орон сууц худалдан авч болох вэ?
-Иргэдэд тавьж байгаа шаардлага бол нэгдүгээрт бодитой баригдаж эхэлсэн барилгатай гэрээ байгуулах хэрэгтэй. Барилгын метр квадратын хэмжээгээр нь зургаан хувийн хүүтэй зээл олгоно. Засгийн газрын 138 дугаар тогтоолд 50 метр квадратаас дээш анх удаа орон сууц худалдан авч байгаа иргэдэд орон сууц олгогдоно. Мөн эх орны хишгээрээ авч болно.

-Зээлийн талаар нарийн журам гарах уу. Ямар банкнаас олгох вэ?
-Мэдээж гарна. Журам гарснаар илүү нарийн зохицуулалтууд бий болно. Мөн арилжааны банкууд нь тодорхой болох учиртай.

-Нэг метр квадрат нь ямар үнэтэй байх вэ?
-Үнийг засгийн газраас тогтоохгүй. Өмнө нь баригдсан төрийн албан хаагчдын 4000 айлын орон сууцны хөтөлбөр хэрэгжихээс өмнө метр квадратын үнэ 450-460 байсан. Банкуудад ашигтай хамгийн найдвартай зээл бол орон сууц барьцаалсан зээл байдаг. Тиймээс асар их өрсөлдөөнийг зах зээлд авчирдаг. Бодит үнийг тогтоохын тулд эрэлт, нийлүүлэлт хоёрыг тэнцвэржүүлсний үндсэн дээр тогтоох бодлого барьж байна. Одоогоор үнийг урьдчилан тогтоох боломжгүй.

-Нийслэлийн иргэн нийслэлээсээ л орон сууц худалдаж авах ёстой юу?
-Монгол улсын иргэн л бол хаанаас ч авч болно. Аймгаасаа авна уу хотоос авна уу үүнийг хязгаарлахгүй .

-100 мянган айлын орон сууцны хөтөлбөрт төрөөс ямар нэгэн оролцоо үзүүлж байгаа юу?
-Орон сууц барьж байгаа бизнесийн байгууллагуудад дэмжлэг үзүүлэх, орон сууц барих нөхцөл бололцоог хангаж өгөх талаар төр дэмжлэг үзүүлнэ. Үүнээс гадна иргэдийг орон сууц худалдаж авах таатай нөхцөл бүрдүүлэхэд төрийн бодлого чиглэх ёстой гэсэн агуулгын хүрээнд оролцож байгаа. Засгийн газраас баримталж байгаа нэг гол бодлого бол томоохон хороолол хотхон барихад гол шугам сүлжээг нь улсаас тавьж өгье. Хөрөнгө санхүүг нь шийдэх байгаа юм. Засгийн газрын 149 дүгээр тогтоолоор эхний ээлжинд хөгжлийн банкны эх үүсвэрээр барих инженерийн шугам сүлжээний жагсаалтыг баталсан. Үүнд дулаан, цахилгаан, цэвэр бохир ус зэрэг багтана.

-Инженерийн шугам сүлжээнд хаана баригдаж байгаа барилгууд хамрагдсан бэ?
-Буянт-Ухаа, VII хороолол, Яармаг, МҮОНТ-д баригдах хорооллуудад улсаас инженерийн гол шугамыг тавьж өгөхөөр болсон.

www.top.mn