УИХ-ын нэгдсэн чуулганы хуралдаанаар Ашигт малтмалын хайгуулын тусгай зөвшөөрөл шинээр олгохыг хориглох тухай хуульд өөрчлөлт оруулах тухай хуулийн төслийг хэлэлцэж, дэмжлээ.

Төсөлд ашигт малтмалын хайгуулын лиценз шинээр олгохыг хориглох хугацааг энэ оны арванхоёрдугаар сарын 31-ныг хүртэл сунгах талаар заасан юм. Гишүүд "Хайгуулын лиценз олгохгүй байгаагаас үүдэн 50, 100 лицензтэй эрх мэдэлтнүүд түүнийгээ үнэ хүргэн бие, биедээ зарах үзэгдэл газар авч байна" гэлээ.

Түүнчлэн Монголын Хөрөнгийн бирж дээр хайгуулын болоод ашиглалтын лицензүүдийг бүртгэн авч төрийн ой санамжийг сайжруулахгүй бол байгаль орчин сүйтгэж дуусч буйг ч анхаарууллаа.

Ашигт малтмалын лиценз шинээр олгохыг хориглосон нь нэг талдаа эерэг үр дүн дагуулж буй ч, нөгөө талдаа орон сууцны үнэд нөлөөлж байна гэж гишүүд үзэж байна. Хуулиа барилгын түүхий эд болдог элс, хайрга зэрэг байгалийн гаралтай бүтээгдэхүүний лиценз олгохыг ч хориглосон.

Тиймээс барилгын компаниуд түүхий эдийн нийлүүлэлтээр гачигдаж, өндөр үнэтэй элс, хайрга худалдан авч, барилгаа барьж буй ажээ.