Улаанбаатар хотын иргэд амралт чөлөөт цагаа эрүүл цэвэр орчинд зөв боловсон өнгөрүүлэх боломжийг бүрдүүлэх зорилгоор Баянзүрх дүүргийн 12 дугаар хороонд Үндэсний цэцэрлэгт хүрээлэнг байгуулахаар болж ТЭЗҮ-ийг боловсруулж дууссан байна. Энэхүү цэцэрлэгт хүрээлэнг урт удаан настай, хойч үедээ үлдэцтэй хийхийн тулд хотын удирдлагууд ТЭЗҮ боловсруулах зөвлөх үйлчилгээний тусгай баг ажиллуулсан бөгөөд тус багийнхан боловсруулсан төслөө танилцуулж, хотын удирдлагуудын санал бодлыг сонслоо. Япон, Англи, Франц, Солонгос мэргэжилтнүүд оролцсон зөвлөх багийнхан Үндэсний цэцэрлэгт хүрээлэнгийн хөрсний болон геологийн судалгаа, байгаль орчны ерөнхий болон нарийвчилсан үнэлгээ, цэцэрлэгт хүрээлэнг хөгжүүлэх ерөнхий төлөвлөгөө, дэд бүтцийн зураг төсөл, бүсчлэлийн төлөвлөгөө, хөрөнгө оруулалтын багц зэрэг цэцэрлэгт хүрээлэнг хөгжүүлэхэд шаардлагатай бүхий л төлөвлөгөө, зураг төслийг хийж гүйцэтгэсэн байна.

     Цэцэрлэгт хүрээлэнд орох хаалга нь монголчуудын бэлэгшээдэг тоогоор 9 орц, гарцтай, хүмүүсийн амарч зугаалах талбай нь морин хуурын хэлбэртэй, захиргааны байр нь соёмбын дүрстэй гэх зэргээр монгол хүний онцлог, эрхэмлэн дээдэлдэг бүхнийг шингээхийг зорьжээ.

    “Цэцэрлэгт хүрээлэнгийн төлөвлөлт бэлэн болсноор хийгдэх ажлууд тодорхой болох бөгөөд хамгийн гол нь энэ цэцэрлэгт хүрээлэнд нэг ч орон сууцны барилга баригдахгүй Хотын даргаар хэн ч байсан, үеийн үед ингэж л ажиллах учиртай” хэмээн Нийслэлийн Засаг дарга бөгөөд Улаанбаатар хотын Захирагч Г.Мөнхбаяр танилцуулага хурлын үеэр хэлсэн үгэндээ онцолсон юм. Нийслэлийн төсвөөс энэ жил Үндэсний цэцэрлэгт хүрээлэнгийн тохижилтын ажилд 1 тэрбум 450 сая төгрөг зарцуулахаар төлөвлөсөн агаад 55 га талбайг тохижуулж, эхний ээлжинд гэрэлтүүлэгтэй болгож, усан сан байгуулах юм.