Иргэний нийгмийн зөвлөлөөс “Иргэний нийгмийн өдөр”-ийг  тохиолдуулан ирэх долоо хоногийн даваа гариг буюу нэгдүгээр сарын 30-ны өдрийн 12:00-14:00 цагт олон нийтэд хандсан “Агаарын бохирдлын эсрэг хамтдаа” нэгдсэн арга хэмжээ зохион байгуулах гэнэ.
Иргэний нийгмийн зөвлөлийнхөн “Олон нийтийн анхаарлыг агаарын бохирдолд хандуулах энэ арга хэмжээнд иргэд өөрсдөө гар бие оролцож, бага ч атугай  хувь нэмрээ оруулах ёстой” гэлээ. Агаарын бохирдлыг бууруулахад иргэд эзэнгүй өрөөнийхөө гэрлийг унтраах, хогоо хогийн саванд хаях, мод тарих гэх мэт энгийн зүйлсээс эхэлж, хажууд байгаа хэн нэгэнд шаардлага тавьж үлгэр дууриал болж оролцвол илүү үр дүнтэй юм гэдгийг ойлгуулах үүднээс энэ арга хэмжээг зохион байгуулж байгаа ажээ.
“Агаарын бохирдлын эсрэг хамтдаа” нэгдсэн арга хэмжээний үеэр танилцуулга, олон нийтэд агаарын бохирдлын хор уршиг, агаарын бохирдлоос хэрхэн ангижрах талаарх мэдээлэл, сурталчилгаа хийх мөн иргэдийн дунд санал асуулга явуулах гэсэн үйл ажиллагаанууд зохион явуулах гэнэ.
Дээрх арга хэмжээнд Монголын байгаль орчны иргэний зөвлөл, Боловсролын иргэний зөвлөл, Эрүүл мэндийн иргэний зөвлөл, “Иргэн-Цэрэг” иргэний зөвлөл, Нийгэм хамгаалал, хөдөлмөрийн салбарын сүлжээ байгууллагууд зэрэг салбар болгоны иргэний зөвлөлүүд хамтран оролцох юм байна. /gonews.mn/