Монгол Улсын Шадар сайд М.Энхболдын ахлан ажилладаг Газар хөдлөлтийн гамшгийн эрсдэлийг бууруулах, мэргэжлийн байгууллагуудын үйл ажиллагааг уялдуулан зохицуулах байнгын ажиллагаатай зөвлөлийн хурал өнөөдөр боллоо.

Өнгөрөгч 2011 онд Нийслэлийн газар хөдлөлтийн бичил мужлалын зургийг шинэчлэн боловсруулах, шаардагдах тоног төхөөрөмж авах хөрөнгийн асуудлыг шийдвэрлэх ажлын хүрээнд 15 хүний бүрэлдэхүүнтэй инженерийн баг ажилласан байна.

Мөн барилгын газар хөдлөлтийн тэсвэржилтийн чадварыг үнэлэх ажлыг эрчимжүүлэх зорилгоор зохих багажаар хангахын тулд 1,9 тэрбум төгрөгийг Шадар сайдын төсвийн багцад тусгаж шийдвэрлэжээ.

Барилга газар хөдлөлтийн чичирхийллийг тэсвэрлэх байдал, чанарыг тодорхойлоход шаардагдах багаж, төхөөрөмжийг нэмэгдүүлж нийслэлийн нийт барилгыг паспортжуулж дуусгах ажлыг 2012 ондоо багтааж дуусгахаар боллоо.

Нийслэлийн барилга байгууламжийн чанар насжилтыг тодорхойлох ерөнхий судалгаанд газар хөдлөлтийн арга хэмжээ тооцоогүй 1961 оноос өмнө баригдсан 152 барилга, 1961-1973 онд баригдсан 126 барилга, 1973-1987 онд баригдсан 89 барилгыг тоолж бүртгэн, хяналтад авсан, нийтийн зориулалттай 24560 барилга, байгууламжтайгаас 2005 хүртэл баригдсан орон сууцны 1001 барилга бүртгэлд хамрагдсан байна.

2011 онд паспортжуулалт хийх 42 барилгын жагсаалтыг гаргаж, хэмжилт явуулах төлөвлөгөө боловсруулан хэрэгжүүлж байна. Эдгээр барилгад Сонгинохайрхан дүүргийн 48-1, 27, батлан хамгаалахын 30, 1, 2-60, 5, 4, 30 дугаар байрууд, Баянгол дүүргийн 27, 60, 45, 6а бичил хорооллын 27 дугаар байрууд, Хан-Уул дүүргийн 3, 31, 1, 63, Солонго Ай, 50 дугаар байрууд Сүхбаатар дүүргийн 21, 29, 27, 40, 3, 26а 26, 47, 26, 2а байрууд, Чингэлтэй дүүргийн 19, 14, 3, 32 дугаар байрууд, Баянзүрх дүүргийн төмөр замын-6, 62, 11, 48а, 2, 7а, 22а, ус сувгийн 15, Багануур дүүргийн Эрүүл мэндийн нэгдэл, 5 дугаар байруудад тус тус газар хөдлөлтийн тэсвэржилтийн үнэлгээ хийж, дүгнэлт гаргажээ.

Дээрх 42 барилгаас I хорооллын 27, 4 дүгээр байрууд, Баянгол дүүргийн 45, Сүхбаатар дүүргийн 3 дугаар байруудад чичирхийлэл хэмжигч багажийг суурилуулж, хэмжилт хийж, гаргасан дүгнэлтийг экспертүүдийн баг баталгаажуулж, улмаар тухайн барилгыг буулгах, шинээр өргөтгөх асуудлыг хамтран шийдвэрлэхээр ажиллаж байна.

Одоогийн байдлаар газар хөдлөлт бүртгэх, нүүдлийн өргөн зурвасын 60 станц, дэлхийн соронзон орны өөрчлөлтийг хэмжих 999 станцыг суурилуулсан, эхний мэдээлэл хүлээн авч, анхан шатны боловсруулалт хийгдэж байгаа ажээ.

М.Жаргал /www.gogo.mn/