ЗТБХБЯ, ГХБГЗЗГ, МБХ, “Барилга.МН” БЗМТөв хамтран Барилгын салбарт үйл ажиллагаа явуулж байгаа аж ахуйн нэгж, компаниудын удирдах ажилтнууд болон энэ чиглэлийн мэргэжилтнүүд салбарын төрийн бус байгууллагын удирдлагууд оролцож салбарт тулгамдаж байгаа олон асуудлаас онцлон “Үнэ бүрдэлтийн шинэчлэлт” сэдвийг сонгон хэлэлцүүлэг, семинарыг зохион байгууллаа.

     Хэлэлцүүлэг семинарт ЗТБХБЯ-ны ахлах мэргэжилтэн Г.Лосол Төсвийн үнэ бүрдэлтийн талаар 2011 онд хийсэн ажил болон 2012 онд төрийн байгууллагаас авч хэрэгжүүлэх арга хэмжээнийхээ талаар барилгын компанийн төлөөлөлд мэдээлэл хийсэн юм. Мөн өнгөрсөн жил шинэчлэгдэн батлагдсан “Шинэчлэгдэн боловсруулагдсан барилгын үнэ бүрдэлт, үндсэн дүрэм, төсөв, зохиох заавар”-ыг ажил хэрэг болгон хэрэгжүүлэхэд барилгын компаниудад заавар зөвлөгөө

    Үүний дараа ГХБГЗЗГ-ын техникийн бодлого, норм нормативын хэлтсийн ахлах мэргэжилтэн С.Нямаа “Шинэчлэгдэн боловсруулагдсан барилгын үнэ бүрдэлтийн үндсэн дүрэм болон төсөв зохиох заавар гэсэн сэдвээр хэлэлцүүлэг семинарт илтгэл тавилаа.

     Барилгын салбарт үнэ бүрдэлт, төсвийн асуудлаар үйл ажиллагаа явуулж, энэ чиглэлийн чадварлаг мэргэжилтэн бэлтгэн гарахад ихээхэн анхаарч ажилладаг, барилгын үнэ бүрдэлтийн шинэчлэлтийн тал дээр өөрийн дуу хоолойгоо илэрхийлэх чухал байгууллагуудын нэг нь Барилгын Төсөв, Үнэлгээчдийн Холбоо юм. Тус холбооны ерөнхийлөгч Д.Санж “Барилгын үнэ, нормативийн одоогийн байдал” сэдвээр илтгэл тавьсан юм.

     Түүний илтгэл нь хэлэлцүүлэг, семинарт хүрэлцэн ирсэн оролцогчдын хамгийн их сонирхол татсан илтгэлүүдийн нэг байлаа. Учир нь барилгын салбарт хамгийн хурцаар тавигдаж байгаа асуудлуудын нэг юм. Илтгэлийн гол агуулга нь орон сууцны үнэ өсөж байгаагийн гол шалтгаан нөхцөлүүд, барилгын салбар дотроо хамгийн хоцрогдсон дампуурсан дэд салбар бол барилгын үнэ бүрдэлт, төсвийн нормативийн ажил байгааг хатуухан шүүмжилсэн билээ. Мөн түүний илтгэлд орон сууцны барилга их хэмжээгээр баригдаж байгаа ч үйлдвэрлэлийн барилга ерөөсөө баригдахгүй байгаа нь нийт улс орны эдийн засгийг хямруулах нэг нөхцөл болж байгааг онцоллоо.

    Энэхүү хэлэлцүүлэг семинарын өрнөлөөс харахад энэ чиглэлийн асуудал барилгын компаниудад хамгийн хурцаар тавигдаж байгаа нь харагдаж байв. Учир нь хэлэлцүүлэгт ирсэн оролцогчид нь барилгын салбарт олон жил ажилласан жинхэнэ мэргэшсэн мэргэжилтнүүд байсан учраас үнэ бүрдэлтийн асуудал дээр хамгийн их шүүмжлэлтэй хандаж өөр өөрийн өнцгөөс харсан тайлбараа хэлж байсан юм.

     Барилга Корпорацийн ерөнхийлөгч Л. Шагдаррагчаа барилгачдын төлөө хийж байгаа дорвитой ажил байхгүй байгааг хатуухан шүүмжилээд 2010 оноос хойш барилгын салбар ямар төлөвлөгөөгүй явж байна. Барилгын салбарт хувийн компаниуд л ашиг олж байгаа болохоос мэргэжлийн барилгачдад ашиг олно гэсэн ойлголт байхгүй, барилгын норм дүрэм, үнэ боловсруулана гэдэг маш нарийн ажил учраас бүх зүйл дээр нь барилгынханы үзэл бодлыг тусгах ёстойг төрийн байгууллагынханд хатуухан сануулж, шүүмжиллээ.

 

 

     Мөн Монголын төсөвчдийн холбооны тэргүүн Д.Санж барилгын техник, технологи нь шинэчлэгдээд байдаг төсвийн норм дүрэм нь л хуучнаараа яваад байна. Ингэж болохгүй байнга шинэчлэлт хийж явах ёстой, норм дүрэм гэдэг бол нэг ёсны хууль. Энэ хуулинд барилгынхан захирагдаж явах ёстой. Манайхан норм дүрмээ гаргахдаа мөнгөндөө тааруулж хийдэг. Уг нь нормдоо тааруулж мөнгөө гаргаж өгөх хэрэгтэй. Бид ийм жишгээр яваад байвал хэзээ ч чанартай сайн барилга барьж чадахгүй гэдгийг санууллаа.

     Энэхүү хэлэлцүүлэг семинараас гарсан дүгнэлтийг нэгтгэн ЗТБХБЯаманд албан бичиг хүргүүлэх ба жил болгон зохион байгууллагддаг барилгын салбарын удирдах ажилтны зөвлөгөөн дээр хэлэлцэх асуудалд оруулах юм. Мөн дараагийн удаа хэлэлцэгдэх ямар тулгамдсан асуудал байгаагаа ярилцаад хэлэлцүүлэг семинараа өндөрлөлөө.