Иргэдийг 2013 оноос өмнө газраа өмчилж авахыг газрын албаны мэргэжилтнүүд хэлж байгаа билээ. Энэ талаар Нийслэлийн газрын албаны газар ашиглалт бүртгэлийн хэлтсийн ахлах мэргэжилтэн Ё.Энхээгээс асууж тодрууллаа.

-Газар өмчлөх эрх 2013 онд дуусгавар болох тухай мэдээлэл байна?
-2013 оны тавдугаар сарын 1-нийг хүртэл газар олгоно. 2003 онд иргэн бүрт газар үнэгүй өмчлөх тухай хууль баталсан. Уг хуульд 2008 онд нэмэлт, өөрчлөлт оруулж иргэн бүрт үнэгүй олгохоор болсон, Гэхдээ байршлын хувьд хязгаартай болсон. Хууль хэрэгжсэнээс хойш нийт 88138 иргэн 4801,59 га газрыг гэр бүлийн хэрэгцээнд ашиглахаар өмчилсөн байна. Үүнийг нийт хүн амтайгаа харьцуулахад 7,6 хувь нь газраа өмчилсөн байна гэсэн үг.

-Нийслэлийн иргэд зөвхөн харъяа дүүргээсээ газар авна гэсэн төөрөгдөл байна. Энэ үнэн үү?
-Дүүрэг, дүүрэгг газар олгоно гэсэн асуудал байхгүй. Нийслэлийн иргэн л бол хаана ч газар өмчлөх эрхтэй. Гэвч нийслэлийн газрын нөөц дуусч байгаа, 2008 онд хийсэн газрын нөөцийн судалгаагаар есөн мянган га газар бий гэж гарсан. Ингэхдээ нөөц газрыг иргэдэд шууд өмчлүүлдэггүй, хэсэгчилсэн ерөнхий төлөвлөгөөнд хамруулсны дараа иргэдийн хүсэлтийг хүлээн авна. Нийслэлийн алслагдсан дүүргүүд болох Багануур, Налайх, Багахангай болон Хан-уул дүүргийн Өлзийт хороолол, Сонгинохайрхан дүүргийн 21 хороонд газар байгаа. Иргэд тус орчимд газар өмчлөх боломж байна.