УИХ-ын Эдийн засгийн байнгын хорооны хуралдаанаар Тогтоолын хавсралтыг шинэчлэн батлах тухай УИХ-ын тогтоолын төслийг хэлэлцлээ. УИХ-аас 2010 оны зургадугаар сард “Шинэ бүтээн байгуулалт” хөтөлбөрийг баталсан юм. Энэхүү хөтөлбөрийн хүрээнд улсын хэмжээнд 100 мянган айлын орон сууц барихаар төлөвлөсөн. Дээрх ажлыг гүйцэтгэхэд 20 гаруй дагавар хуулиудыг шинэчлэн найруулах болон нэмэлт, өөрчлөлт оруулах шаардлага тулгарч энэ чиглэлээр салбарын яам нь зарим хуулиудыг нэгтгэж, заримыг шинэчлэн боловсруулсан байна. Тухайлбал, одоо УИХ-аар Газрын тухай багц хуулийн төслүүдийг хэлэлцэж буй. “Шинэ бүтээн байгуулалт” хөтөлбөрийн хүрээнд дэд бүтцийн ажлуудыг гүйцэтгэхтэй холбоотойгоор зарим газрыг улсын хэрэгцээнд авах шаардлага тулгарч байгаа. Ийм асуудал үүссэн нөхцөлд Газрын тухай багц хуулийн төсөлд заасан заалтын дагуу шийдээд явахаар тусгажээ.

Дээрх асуудлын хүрээнд гишүүд “Шинэ бүтээн байгуулалт” хөтөлбөрийн ажлын явц ямар байгааг Зам тээвэр, барилга хот байгуулалтын сайд Х.Баттулгаас сонирхлоо. Учир нь хөтөлбөр батлагдаад хоёр дахь жилдээ орох гэж буй. Тодруулж хэлбэл, хоёр намрыг үдэн хоёр хавартай золгосон. Ажил хийгдэж байна гэдэг ч ахисан юм байдаггүй. Хөгжлийн банк хөрөнгө босгохыг харсаар суутал  Улаанбаатар хотын хувьд орон сууц барьж болох боломжит талбайд аж ахуйн нэгжүүд өөрсдийн барилга байшингаа барьчихсан. Нэг ёсны “Шинэ бүтээн байгуулалт” хөтөлбөрийн ажил удаашралтай байгаад гишүүд шүүмжлэлтэй хандаж буй юм.  Салбарын сайдын тайлбарласнаар өнгөрсөн хугацаанд яамны зүгээс “100 мянган айл орон сууц” хөтөлбөрийг хэрэгжүүлэхтэй холбоотойгоор санал авч, тендэр зарласан. Нийтдээ 160 мянган айлын орон сууц барих төсөл боловсруулагдаж дууссан. Мөн энэхүү хөтөлбөрийн хүрээнд орон нутгуудыг хөгжүүлэх зорилго зорилт давхар туссан. Энэ хүрээнд эхний ээлжинд Төв, Өвөрхангай, Баянхонгор, Баян-Өлгий, Ховд зэрэг аймгийн таван суманд Канад технологиор загвар сум байгуулна. Загвар сумын төсөл амжилттай хэрэгжвэл хоёр дахь ээлжинд 96 сумыг дээрх технологийн дагуу хөгжүүлэх зорилт тавьж цаасан дээр ерөнхий төлөвлөгөө гаргасан байна. Нэг үгээр хэлбэл, “Шинэ бүтээн байгуулалт” хөтөлбөрийн цаасан дээрх ажлын гүйцэтгэл 80-90 хувьтай байна” гэсэн хариултыг сайд Х.Баттулга өгч буй юм.

Уул уурхайн эрчимтэй хөгжлийг дагаад Өмнөговь аймгийн Ханбогд, Цогтцэций, Гурван тэс сумдыг хот хэлбэрээр хөгжүүлэх шаардлага мөн тулгарч байгаа аж. Учир нь дээрх аймагт Оюутолгой, Тавантолгой гэсэн стратегийн хоёр том орд оршиж буй нь орон нутгийн хөгжлийг хотоор төлөвлөхөөс аргагүйд хүргэжээ. Засгийн газрын төвшинд дээрх аймгийн хэтийн төлөвийг хэрхэн төлөвлөж буйг ч энэ үеэр УИХ-ын гишүүн Х.Бадамсүрэн сонирхлоо. Ямартай ч Засгийн газрын төвшинд энэ асуудлыг судлахаар болж Тэргүүн шадар сайд Н.Алтанхуягаар ахлуулсан ажлын хэсэг байгуулагдсан. Ажлын хэсгийнхэн дээрх гурван сумдын хэтийн төлөвийг судалгаа шинжилгээ хийн гаргах юм байна.

Харин зарим гишүүдийн шүүмжилснээр бол УИХ болоод Засгийн газар нь хөдөө рүү хэт анхаарал хандуулаад нийслэлээ мартчихаж. Гэтэл Улаанбаатар хотод өнөөдөр хүн амынх нь тэн хагас амьдардаг. Их хотоо тэлэх талд анхаарал хандуулж,  хаана нь юу барихаа төлөвлөхгүй бол одоо зайтай болгонд нь байшин сүндэрлүүлээд шавааралдсан юм болсон. Газар хөдлөлт болбол яаж ч мэдэх аюултай байдалд байгаа. Нөгөө талаас томоохон төсөл хөтөлбөр хэрэгжүүлэхтэй холбоотой газрыг улсын тусгай хэрэгцээнд авна гэсэн агуулга бүхий заалт Газрын тухай хуульд багцлагдаж орсон нь нэг талаар нэгэнтээ өмчлөөд авчихсан газрыг том төсөл хөтөлбөр хэрэгжүүлэх гэж байна гэсэн агуулгаар төр төмөр нүүр үзүүлэн иргэд, аж ахуйн нэгжүүдээс шууд хурааж аваад байвал эргээд сөрөг үр дагавар дагуулж мэдэхээр буйг хэлэлцүүлгийн шатанд анхаарах шаардлагатайг ч   гишүүд хөндлөө. Ингээд энэхүү Тогтоолын хавсралтыг шинэчлэн батлах тухай УИХ-ын тогтоолын төслийг хэлэлцэх нь зүйтэй хэмээн үзэж, УИХ-ын чуулганы нэгдсэн хуралдаанд оруулахаар болж тогтлоо.

News