Барилгынхан гэхээр хуурамч юм хийгээд мөнгө олохын төлөө ажилладаг юм шиг сэтгэгдэл  төрүүлэхээр мэдээлэл хэвлэл мэдээллийн хэрэгслүүдээр дэндүү их яваад байна. Чанаргүй барилгууд баригдаад байгаа нь олон талтай, ганцхан инженер техникийн ажилчид, гүйцэтгэгч нарт бурууг өгч болохгүй. Чанаргүй барилгууд баригдаад байгаад эздийн нөлөө ч их бий гэсэн барилгачдын эсэргүүцэл багагүй гардаг. Гэтэл хэвлэл мэдээллийн хэрэгслээр дамжуулан болж бүтэхгүй байгаа зүйлүүдийг иргэдийнхээ сонорт хүргэх нь бидний үүрэг яахын аргагүй мөн билээ. Барилгын чанараас гадна эргэн тойронд нь өөр маш олон асуудал байдгийн нэг жишээг одоо харуулъя. Би өдрийн ажлаа амжуулчихаад ажил руугаа явж байгаад нэг зүйлээс их айлаа. “Бөмбөгөр” худалдааны төвийн урдхан талд Чингэлтэй дүүргийн Төрийн албан хаагчдын барилгыг барьж байгаа “Би Энд Кэй” ХХК барилгынхаа эргэн тойрны явган зорчигчдын аюулгүй байдлыг хангах хамгаалалтын саравч огт бариагүй гаднах пассадаа хийж байх юм. Хажуугаар нь өнгөрч яваад дээрээс жижигхэн юм унах шиг болохоор нь хартал доогуураа өнгөрч яваа хүмүүсийг тоосон ч шинжгүй ажлаа хийж байлаа. Хэрвээ хамгаалах саравч барилгынхаа аюул бүхий талд нь хийгээгүйн улмаас доогуур нь явж буй хүмүүс барилга дээрээс унах ямар нэгэн зүйлд өртвөл дараа нь хариуцлагыг нь хэн хүлээх вэ? Нөгөө эзэд нь саравч барих материалаар нь хангахгүй байна уу, эсвэл тус компанийн ажилчид үүнийг мартаж, ажилдаа хариуцлагагүй хандав уу? Бүр байг гэхэд доогуур нь зорчих хүмүүсээс гадна хүний өмч хөрөнгө сүйдэх магадлал өндөр шүү дээ. Ямартай ч муу зүйл зөгнөж энэ асуудлыг хөндсөнгүй. Бүтээн байгуулалт өрнөж байгаа хотын маань олон газар сүндэрлэх барилгын хамгаалалтын саравчийг хийгээгүйгээс хүний эрүүл мэнд, амь нас, эд хөрөнгө хохирох тохиолдол цөөнгүй гарч байсан. Тийм зүйл дахин тохиолдохгүй байгаасай гэсэн үүднээс уг асуудлыг хөндлөө.