Шугам сүлжээ янзалж байна гээд энд тэндгүй газар ухаж хэд хоногийн ажил болж, замын түгжрэлд хувь нэмэр оруулдаг үзэгдлийг таслан зогсоосон таатай мэдээлэл сонсогдлоо.

     Нийслэлийн Чингэлтэй дүүргийн 2-р хороо бидний хэлж заншсанаар 40 мянгатын орон сууцны байрнуудын гадна инженерийн шугам сүлжээг хонгилын системд шилжүүлсэн төслийн танилцуулагыг хийлээ. Энэ ажил нь Нийслэлийн засаг дарга бөгөөд Улаанбаатар хотын захирагч Г. Мөнхбаярын санаачлагаар бий болж байгаа бүтээн байгуулалтын ажил бөгөөд нийслэлийн хөгжлийн түүхэнд бас нэгэн шинэ хуудас нэмсэн үйл явдал болж байна.

     Шугам сүлжээг дотроос нь шинэчлэдэг болсоноор газар ухаж, сэндийчдэг таагүй байдлыг таслан зогсоохоос дэлхийн жишигт нийцсэн газар доогуурх хотыг бий болгох үндэс суурь нь тавигдаж байгаа юм.

    Төмөр бетон хийц бүхий нэвтрэх сувагт инженерийн шугам сүлжээг байрлуулсанаар иргэн Батынд халаалтын системны гэмтэл гарлаа гэхэд хурдан хугацаанд гэмтлийг тодорхойлон засварлах боломжтой. Энэхүү түгээх сүлжээ нь бүрэн автомат бөгөөд хонгилд байруулсан интернетийн сүлжээ нь ямар нэг гэмтэл, асуудал үүссэн тохиолдолд тэр дор нь диспетчерийн удирдлагын программд дамжуулна. Хонгилын системийн урт нь 196 м, өндөр нь 2,4 м, өргөн нь 3,0 м, төмөр бетон цутгамал хийцтэй 937 у/м, агаар оруулах болон сорох салхивчийн автомат системтэй, ус зайлуулах, траптай, гэрэлтүүлэгтэй, хяналтын камертай байгууламж юм.

      Мөн “түгээх сүлжээг” байгалын гамшгийн үеэр хорогдох байр болгон ашиглаж ч болох гэнэ. Байгууламжийн дээр явган хүний зам, авто зам барьж, цэцэрлэгт хүрээлэн байгуулахаар зураг төсөлд нь тусгагдсан бөгөөд хавартай зэрэгцэн ажлаа эхлүүлэх юм байна.