-Газрын маргааны заргыг “Алтай констракшн” ХХК-ийн талд гаргав-

“Алтай констракшн” компанийн нэхэмжлэлтэй, Нийслэлийн Засаг даргыг хариуцагчаар дуудсан газрын маргааны ээлжит шүүх хурал өнгөрсөн баасан гарагт боллоо.

Хэд хэдэн удаа хойшилж буй тус шүүх хурал Нийслэлийн захиргааны хэргийн шүүх дээр товлосон хугацаандаа буюу 11.00 цагт эхэлсэн юм. Шүүх хуралд шүүгчээр Э.Лхагвасүрэн, Д.Сайхантуяа, Д.Эрдэнэчимэг, нэхэмжлэгчээр “Алтай констракшн” компанийн гүйцэтгэх захирал Б.Батбаасан, өмгөөлөгчөөр Г.Мөнхбат оролцсон юм.

Мөн хариуцагчаар хотын даргын итгэмжлэгдсэн төлөөлөгч Ариунгэрэл, Энхжаргал болоод иргэдийн төлөөлөл, хэвлэл мэдээллийнхэн оролцлоо. Хурлын үеэр Хан-Уул дүүргийн нэг дүгээр хорооны иргэдийг төлөөлж ирсэн тус хорооны иргэн “Нийтийн эзэмшлийн ногоон бүсэд “Алтай констракшн” компани орон сууц барих гэж улайран дайрсаар байна.

Нийтийн эрх ашгийг уландаа гишгэж, Нийслэлийн Засаг даргыг хэрэгт унагах гэсэн энэ компани арай дэндэж байна. Мөнгө нь дийлдэг юм бол “Алтай констракшн”, хууль нь дийлбэл Хотын дарга ялна гэдгийг удаа дараа хэлж байгаа.

“Шүүхийнхний шийдвэр хэнийх нь талд гарахаас шүүгч нарын царайг таниулна гэж хэлж Шүүх хурал таван цаг үргэлжилсний дараа шүүх бүрэлдэхүүн завсарлага авч, шийдвэрээ гаргахаар болсон.

Ийнхүү шүүхийн шийдвэр гарч, газрын маргааны заргыг “Алтай констракшн” ХХК-ийн талд гаргасан юм. Шүүхийн шийдвэрийг сонссоны дараа бухимдсан иргэд “өнөөдрийг хүртэл хуулийн байгууллагад л итгэж байлаа. Гэвч мөнгө нь л дийлдэг юм байна” хэмээж байв.

Н.Бямбаа
Эх сурвалж: “Нийслэл таймс”