Нарангийн энгэрийн төвлөрсөн хогийн цэгт 3.5 сая ам.доллараар хог боловсруулах үйлдвэр барьжээ.

Тус үйлдвэрийг БНСУ-ын буцалтгүй тусламжаар хоёр сарын хугацаанд барьж, өнөөдөр нээлтийн ажиллагаа нь болох юм байна. Өнөөдрийн байдлаар нийслэлээс өдөрт 800 орчим тонн хог гардаг ажээ. Шинэ хог боловсруулах үйлдвэр өдөрт найман тонн хог боловсруулах хүчин чадалтай агаад цаашид хүчин чадал нь нэмэгдэх гэнэ. Хог боловсруулах үйлдвэр ашиглалтад орсноор нийслэлд гарч буй хогийн 80 гаруй хувийг дахин боловсруулах юм. Хог боловсруулах явцад хаягдал бага гарах бөгөөд боловсруулсан хогийг түлшний зориулалтаар ашиглах боломжтой аж.

Үйлдвэрлэсэн түлшээ эхний удаад Сонгинохайрхан дүүргийн 26 дугаар хорооны орчимд байрлаж буй сургууль, цэцэрлэгт нийлүүлэхээр төлөвлөжээ. Мөн Нарангийн энгэрийн хогийн цэгт ажилладаг хүмүүсээс 40 иргэнийг сургалтад хамруулж тус үйлдвэрт ажиллуулах юм байна.