Төрийн өмчийг 2010-2012 онд хувьчлах, өөрчлөн байгуулах үндсэн   чиглэл батлах тухай Эдийн  засгийн байнгын

хорооны өчигдрийн хуралдаанаар хэлэлцлээ. УИХ-ын 2010 оны 11 дүгээр тогтоолын хавсралтад өөрч­лөлт оруулах болсон шалтгаан нь V цахилгаан станцын      хөрөнгө оруулагчийг тодруулахтай холбоотойгоор тавигджээ. Азийн хөгжлийн банкнаас хийсэн судалгаагаар ТЭЦ-III дулааны цахилгаан станцыг түшиглэн V дулааны станц бай­гуулах боломжтой гэсэн дүгнэлт гарсан аж.  Иймд Засгийн газраас тус станцтай холбоотойгоор Концессын гэрээгээр сонгон шалгаруулалтад орж ирэх хөрөнгө оруулагч нь үндэснийх байх бөгөөд гадаадын хөрөнгө оруулагчтай хамтран оролцох боломжтой гэж үзэж, тогтоолд өөрчлөлт оруулахаар болжээ. 

УИХ-ын гишүүн Р.Буд нүүрсний ордуудыг түшиглэн дулааны цахилгаан станц барьж байгуулахаар болсон төрийн бодлого хаана гээгдсэн. Мөн Оюутолгойн ордыг түшиглэн станц барих болсон нь үнэн эсэхэд хариулт шаардлаа. УИХ-аас Оюутолгойн хөрөнгө оруулалтын гэрээ байгуулах шийдвэрийг Засгийн газарт олгож байснаас биш тус ордыг түшиглэн цахилгаан станц байгуулах эрх олгоогүй гэдгээ ч тодотгосон юм. Мөн Тавантолгойн ордыг түшиглэн станц барихыг төрийн бодлогод тусгаж өгсөн ч сүүлийн үед бүдгэрэх талдаа орсон. Хэрэв Засгийн газар ийм шийдвэр гаргасан бол нэг талдаа хууль зөрчсөн үйлдэл болно. Зайлшгүй ингэх шаардлага тулгарсан бол түүнийгээ УИХ-д оруулж ирж зөвшөөрөл авах байсан гэдгийг эрхэм гишүүн онцоллоо.

Ч.Хүрэлбаатар сайд Оюутолгойн ордыг түшиглэн бага оврын станц барих асуудал Засгийн     газрын  хуралдаанаар хэлэлцэгдсэн ч эцсийн шийдвэр гараагүй гэв. Мөн Тавантолгойн ордыг түшиглэн цахилгаан станц барих асуудал  хэвээрээ байгаа гэлээ. Хүчин чадлын хувьд Тавантолгойнх 600 мгв-т, Оюутолгойн ордынх 150 мгв-т аж. Байнгын хорооны дарга Ц.Баярсайхан “Оюутолгойн ордыг түшиглэн цахилгаан станц барих эрхийг төр хэрхэвч олгож болохгүй. Учир нь Тавантолгойн ордын нүүрсийг хятадуудад худалдаж   авахгүй  гэвэл тэр их коксжуулсан нүүрсний хэрэглэгч нь Оюутолгой болж хувирах ёстой” гэлээ. Тиймээс үе үеийн УИХ болон  Засгийн газрын үргэлжлүүлэн барих бодлого нь Оюутолгойн ордыг түшиглэн станц   байгуулах шийдвэрийг хэзээд гаргаж болохгүй гэлээ.  Хоёр дахь гаргаж болохгүй шийдвэр бол мөн л тус ордын дэргэд олон улсын нисэх онгоцны буудал байгуулах эрхийг Засгийн газар болоод УИХ-аас олгож болохгүй гэнэ. Харин Дулааны V цахилгаан станцын хувьд тендер зарлахад гадаадын хөрөнгө оруулагчид дуртай орж ирэхийг гишүүд онцлов.