Хан-Уул дүүргийн Засаг даргын орлогч М.Орхонбаяраар ахлуулсан ажлын хэсэг Хөдөлмөрийн аюулгүй байдал, эрүүл ахуйн тухай хуулийн хэрэгжилтийн шалгалтыг дүүргийн Мэргэжлийн хяналтын хэлтэс, Нийгмийн хэлтэс, Цагдаагийн хэлтэс, Нийслэлийн Үйлдвэрчний эвлэлүүдийн холбоо, хамтран 10-р сарын 20-ноос эхлүүлсэн билээ. Энэ хүрээнд уг шалгалтын ажлын хэсэг дүүргийн нутаг дэвсгэрт шинээр баригдаж буй "Хурд", "Тайж таун" групп, "Сан Транс Монголиа" зэрэг компанийн захиалсан "Оюуны зураг", "Каркас", "Төгс гүрэн" зэрэг гүйцэтгэгч компаниудад шалгалт хийхэд барилгуудын гадна талаар хамгаалалтын шат, тавцан, тор, хүрээ татсан компани байгаагүй аж.

Энэ онд "Хурд" группын захиалгаар баригдаж байсан барилга дээр хөдөлмөрийн аюулгүй байдал хангаж шат, тавцан, тор, хүрээ татаагүйн улмаас гурван гүйцэтгэгч компани дээр үйлдвэрлэлийн осол гарч, гурван ажилчин гэмтсэн тохиолдол гарсан байна.

Энэхүү шалгалтын үеэр барилгын гүйцэтгэгч компаниуд ажилчдаа нийгмийн даатгал болон үйлдвэрлэлийн ослын даатгалд 100 хувь хамруулдаггүй. Мөн барилга дээр ажиллаж буй ажилчдын гал тогоо эрүүл ахуй, стандартын шаардлага хангаагүй зэрэг нийтлэг зөрчил илэрчээ.

Барилгын гүйцэтгэгч компаниуд болон барилгын материал үйлдвэрлэгчид хамрагдах энэхүү шалгалт 10-р сарын 28-ныг дуустал үргэлжилнэ.