Элчин сайдын яамдуудын байрыг түрээсээр авах нь зүйтэй хэмээн Аюулгүй байдал, гадаад бодлогын байнгын хорооны дарга хэлэв.

Тус байнгын хорооны хуралдаанаар Дипломат төлөөлөгчдийн газруудын байршил, орон тоо, үл хөдлөх хөрөнгийн асуудал, цаашид авах арга хэмжээний талаар Гадаад харилцааны сайд Г.Занданшатарын мэдээллийг сонссон юм.

Энэ үеэр Я.Батсуурь "Засч сайжруулах, шинээр барих зэрэгт төсөв гаргалгүй яахав. Гэхдээ анхаарах зүйл бий. Ялангуяа байршлын тал дээр гээд АНУ-д байрлах элчингийн газрыг сонгохдоо хэрхэн будилж байсан талаар жишээ болгон ярьсан юм. Мөн Германы Элчингийн байр ч ялгаагүй, Германы жирийн иргэдийн оршин суудаг газар байрласан. Тэнд нь төр, захиргааны болоод элчингийн байрнууд бараг байхгүй" гэв.

Тэрбээр, туршлагагүй залуу мэргэжилтэн, дипломатч томилж, өнөөх нь туршлагагүйтдэг талаар дурьдаж, судалгаа хийхийг анхааруулсан. Харин С.Баяр гишүүн үргүй зардал буюу түрээсийн байранд их хэмжээний зардал гаргадгийг харгалзан, энэ жилээс хэд хэдэн арга хэмжээг эхний ээлжинд авч хэрэгжүүлэх нь зөв гэв.

Тухайлбал, цалин, үл хөдлөх хөрөнгийн урсгал зардлыг шийдэх нь гадаадад байгаа ЭСЯ-дуудын хувьд чухал байгааг тэрбээр онцлов. Түүнчлэн эхлээд дөрвөн газрын асуудлыг дэмжих санал гаргав. Тодруулбал, Токиогийн ЭСЯ-ны барилга цууралт өгсөн. Тэнд байнга л газар хөдлөлтийн чичирхийлэл мэдрэгдэж, газар хөдлөлтийн идэвхтэй бүсэд байдаг тул 12 баллын газар хөдлөлтөд тэсвэртэй барилга барихаар болсон аж.

Гэхдээ заавал тансаг байдлаар бус бөх бат барилгыг мэргэшсэн барилгын компаниар бариулах нь чухал гэдгийг ч тодотгов. Энэ мэтчилэн гишүүд асуудалтай холбогдуулан санал бодлоо солилцсон.

Мөн энэ үеэр гишүүд төсвийн урсгал зардлыг багасгах талаар тодорхой саналуудыг гаргасан. Тухайлбал, сургууль, цэцэрлэг, эмнэлэг орохгүйгээр зөвхөн төрийн албаны конторын барилга барихад 150 тэрбум төгрөг тусгасныг гишүүд шүүмжлэв. Харин үүний оронд иргэдийг орон сууцжуулах томоохон төсөл, хөтөлбөр хэрэгжүүлж байгаа энэ үед төр өөрөө төсвийн мөнгөөр барилга барих нь эргээд энэ үйл ажиллагаагаа хязгаарлах, үнэ хөөрөгдөх, барилгын материал нийлүүлдэг боомтын ачааллыг ихэсгэж, түгжээ үүсгэх нөхцөл болно гэж анхааруулав.

Мөн байнгын хорооны хуралдаанаар ирэх оны төсвийг хэлэлцэх үеэр УИХ-ын гишүүн Х.Жекей Батлан хамгаалахын их сургуулийн оюутны дотуур байр барихад зориулан нэг тэрбум төгрөг, Гадаад харилцааны сайдын төсвийн багцад гадаад орчны судалгаа, шинжилгээнд ажилд зориулан 250 сая төгрөг, Цөмийн энергийн газрын хөрөнгө оруулалтын төсвийг 4.650.0 сая төгрөг нэмж тусгах санал гаргаж, гишүүд дэмжив.

Харин УИХ-ын гишүүн Я.Батсуурь Эрхүү дэх Ерөнхий консулын газрын ажилчдын орон сууцны барилга барихад зориулан 2.5 тэрбум төгрөг нэмж тусгахыг дэмжихгүй байгаа, гадаадад суугаа Дипломат төлөөлөгчдийн газрын ажилтнуудын орон сууцны асуудлыг үрэлгэн зардалтай байшин барих аргаар биш өөр аргаар шийдэж байх нь зүйтэй гэж санал гаргалаа.