Япондоо хаягдал хайлш боловсруулах талаар 50 жилийн туршлагатай Кавашима групп Улаанбаатар хотод өөрийн ижил төрлийн үйлдвэрлэл явуулах талаар зургаан  жилийн хугацаатай судалгаа хийжээ. Тус компанийнхан өнөөдөр Нийслэлийн Засаг даргын нэгдүгээр орлогч Б.Баатарзоригтой уулзаж, энэ талаар хоттой хамтарч ажиллах талаар санал солилцлоо.

Кавашима групп нь ахуйн болон үйлдвэрлэлийн хаягдал түүхий эдийг боловсруулж, гулдмай болгон бэлтгэж үйлдвэрүүдэд нийлүүлж иржээ. Тэд манайд энэ чиглэлийн үйлдвэр байгуулахаар зургаан жил судалгаа хийсний эцэст одоо нийслэл хотын хог хаягдалд тохирсон хэдий хэмжээний хүчин чадалтай үйлдвэр байгуулах талаараа тогтохоор холбогдох хүмүүстэй уулзаж яваа гэв. Энэ чиглэлээр өмнөд хөрш болоод Солонгос гээд хамтарч ажиллах санал тавьж буй газрууд олон бий. Гэвч бусад орнуудад нэвтрүүлсэн туршлага, байгаль орчинд ээлтэй эсэх зэргийг харгалзан япон технологи нэвтрүүлэхийг сонирхож байгаа гэдгийг хотын нэгдүгээр орлогч дуулгаад олон жилийн судалгаа хийж байгаа нь сайшаалтай ч цаашид алгуурлалгүй үйлдвэр байгуулах ажилдаа орох хэрэгтэй байгааг онцолсон юм. Хэрэв энэ үйлдвэр манай улсад байгуулагдвал гаднаас авдаг экспортын түүхий эдийг орлох боломжтой юм.