Монгол Улсын иргэнд газар өмчлүүлэх тухай хуульд өнгөрсөн 2008 онд өөрчлөлт оруулж, 2013 оны тавдугаар сарын 1-нийг хүртэл дахин таван жилийн хугацаанд энэ хуулийг үргэлжлүүлэн мөрдөхөөр болсон.

Өмнө нь иргэд гэр бүлийн зориулалтаар газрыг хамтран эзэмшиж байсан бол хуульд өөрчлөлт оруулснаас хойш иргэн бүр газар өмчилж авах эрхтэй болсон билээ.

Улсын хэмжээнд энэ оны гуравдугаар улирлын байдлаар нийтдээ 260,344 иргэн 28,849,73 га газрыг гэр бүлийн хэрэгцээний зориулалтаар үнэгүй өмчилж авсан статистик мэдээ байна. Монгол Улсын иргэнд газар өмчлүүлэх тухай хууль хэрэгжиж эхэлсэн өдрөөс хойш өнөөдрийг хүртэл нийслэлийн хэмжээнд нийтдээ 87,975 иргэн 4, 801,29 га газрыг гэр бүлийн хэрэгцээний зориулалтаар газраа үнэгүй өмчилж авчээ.

Үндэсний статистикийн хорооноос хийсэн 2010 оны хүн ам, орон сууцны тооллогын дүнгээр Монгол Улсад нийтдээ 2,754, 685 иргэн тоологдсоноос 2,631,117 иргэн газар өмчилж авах эрхтэй буюу Монгол Улсын харьяат иргэн байна. Үүнээс 21 аймагг 1,486,163, нийслэлд 1,144,954 иргэн оршин суудаг гэсэн судалгаа гарчээ.