Монголын мянга мянган залуус, мянга мянган бага дунд орлоготой иргэдийн байртай болох мөрөөдөл унтарсангүй. Хэдийгээр байрны үнэ өдрөөс өдөрт өсч байгаа ч бага дунд орлоготой иргэдийн орон сууцтай болох горьдлого одоо ч тасраагүй хэвээр байна. Тэд хүлээсээр л, цаг хугацаа урссаар л. Хуанлийн хуудас нэг нэгээр урагдсаар шинэ он гарахад ердөө ганцхан сар л үлдлээ. Гэтэл 2011 онд багтаан хэрэгжүүлэхээр төлөвлөсөн бага дунд орлоготой иргэдийг байртай болгох хөтөлбөр “0” хэвээр байгаа.

БНХАУ-ын зээлээр “Шинэ Яармаг” хороолол босно

Намрын эхэн сард буюу наймдугаар сарын 26-ны билэгт сайн өдөр Яармагийн дэнжид шинэ хорооллын шавыг тавих ёслол болсон юм. Энэхүү ёслолд Хятадын Коммунист намын Төв хорооны Улс төрийн товчооны байнгын хорооны гишүүн, Төв хорооны Улс төр, хуулийн хорооны нарийн бичгийн дарга Жоу Юнкан оролцсон ч учиртай. Монголын Засгийн газраас хэрэгжүүлж буй “Шинэ бүтээн байгуулалт” дунд зорилтот хөтөлбөрийн хүрээнд нийтдээ 100 мянган орон сууц  баригдахаар төлөвлөсний 75 мянга нь нийслэлд сүндэрлэнэ. Энэ 75 мянган айлын орон сууцны  15 мянга нь Яармагийн дэнжид баригдах бөгөөд үүнийг Хятадын Засгийн газраас санхүүжүүлж байгаа билээ. Нийтдээ 300 тэрбум төгрөгөөр уг хорооллыг цогцлоох бөгөөд үүнд дунд сургууль, цэцэрлэг, эмнэлэг гээд иргэдэд нэн тэргүүнд шаардлагатай үйлчилгээний байгууллагуудыг ч барихаар төлөвлөжээ. Албаны хүний үгээр Яармагийн дэнжийг чимэглэх шинэ хорооллын инженерийн шугам сүлжээний ажил хийгдэж байгаад хүйтний эрч нэмэгдсэнээр түр завсарлаад байгаа гэсэн. “Шинэ Яармаг” орон сууцны цогцолбор хорооллын санхүүгийн эх үүсвэрийн 300 тэрбум төгрөгийн зээлийн баталгааг 12 жилийн хугацаатайгаар Монгол Улсын Хөгжлийн банкны гаргаж байгаа гэсэн. Өөрөөр хэлбэл, энэхүү зээлийн эргэн төлөх асуудлыг Хөгжлийн банк дааж байгаа юм. Шинэ хорооллыг гурван  хэсэгт хуваан тус бүр хоёр үе шаттайгаар хэрэгжүүлэхээр төлөвлөжээ.

100 мянган хүнд 100 тэрбумыг олгоно

Засгийн газрын 2011 оны 264 дүгээр тогтоолоор “100 мянган айлын орон сууц” хөтөлбөрт хамрагдсан иргэдэд “Хүний хөгжил сан”-гаас нэг сая төгрөг олгохоор шийдвэрлэсэн. Хөтөлбөр хэрэгжээгүй, барилга баригдаагүй болохоор “Хүний хөгжил сан”-гаас олгох нэг сая төгрөгийн асуудал ч бүрхэг болоод байгаа. Нийтдээ орон сууц худалдан авсан 100 мянган иргэнд 100 тэрбум төгрөг олгоно хэмээн 2012 оны улсын төсөвт тусгачихсан байгаа ч уг өрх дөрвөн ам бүлтэй байлаа гэхээр улсын төсөвт асуудал гарах ньтодорхой. Төсөвт 100 мянган иргэн гэдгээр тооцсон болохоос тухайн өрхийн ам бүлийг тооцоолоогүй. Гэтэл эхнэр нөхөр хоёр хүүхдүүдийнхээ “Хүний хөгжил сан”-гийн нэг сая төгрөгийг авна гэвэл асуудал мэдээж үүснэ. Энэ мөнгийг өгөх эх сурвалжийг Засгийн газар төсөвт тусгаагүй.

Төслийн гүйцэтгэл 35 хувьтай байгаа гэв

“100 мянган айлын орон сууц” хөтөлбөрийг техник эдийн засгийн үндэслэл аль хэдийн гарсан гэдгийг Зам тээвэр, барилга хот байгуулалтын яамнаас мэдэгдсэн. Одоогоор дээрх төсөл 35 хувьтай байгаа гэнэ. Зуун мянган айлын орон сууц баригдах газруудыг чөлөөлөх ажлыг Нийслэлийн Засаг даргын Тамгын газар хариуцан ажиллаж байгаа бөгөөд хамгийн хүндрэлтэй, хэцүү ажил энэ болоод байгааг албаны хүн учирласан. Өөрөөр хэлбэл, иргэд газраа өндөр үнээр зарах сонирхолтой байгаа, мөн нэг хашаанд 2-3 айл өрх амьдардаг нь газар худалдан авахад багагүй бэрхшээл учруулжээ. Гэхдээ албаны хүний өгсөн мэдээгээр гэр хорооллыг чөлөөлөх ажлыг ирэх хавар гэхэд дуусгахаар төлөвлөж байгаа бөгөөд үүнийхээ дараа Буянт-Ухаа, Яармаг, Баянголын ам, Ирээдүй, Солонго, Берлин эко, Шинэ Зуунмод, Орхон аймгийн 2А хороолол, хотын шинэ төвийн орон сууцны хорооллын гадна инженерийн шугам сүлжээг концессийн гэрээ болон зээлийн эх үүсвэрээс санхүүжүүлэн барихаар шийдвэрлэжээ.

Зургаан хувийн хүүтэй зээлийг төслийг боловсруулжээ

Бага, дунд орлоготой иргэдэд жилийн зургаан хувиас хэтрүүлэхгүй хүү­тэй зээл олгох асуудлыг Засгийн газрын 2011 оны 138 дугаар тогтоолоор шийдвэрлэсэн. Үүний дагуу салбарын яам болон холбогдох газруудаас  “Иргэ­дийг жилийн зургаан хувийн хүүтэй, 25 жилийн хугацаатай орон сууцны хөнгөлөлттэй зээлд хамруулах журам”-ын төслийг боловсруулан батлуулахаар ажиллаж байгаа гэнэ. Энэ төсөл батлагдчихвал зургаан хувийн хүүтэй зээл гаргах ажил гараандаа гарна гэдгийг салбарын яамны мэргэжилтэн тайлбарласан. Ийнхүү 100 мянган айлын орон сууц хөтөлбөр хэрэгжилт  40 хувьд ч хүрэхгүй байгаа нь ирэх хавар энэ төсөл хэрэгжинэ гэдэгт итгэл муутай байгаагаа холбогдох албаны хүн учирлана лээ.

Ардын Эрх