Өвөл цаг ирлээ. Та өвлийн цасан шуурга, хүйтэн өдрүүдийг ажралгүй давах бэлтгэлээ бүрэн хангасан уу? Эргэлзээтэй л асуудал. Нөгөө л “Болно доо болно” гэдэг шиг явсаар дүн өвөл хэцүүхэн байдалтай тулгарна. Хүйтний улирал эхлэх гэж байгаатай холбогдуулан “Барилга.МН” сэтгүүлийн хуудас бүрнээ танд хэрэг болохуйц мэдээллийг нийтлэн хүргэхийг зорьж байгаа билээ. Энэ удаа дулаан алдагдал байр сууцны чинь хаагуур хамгийн их байдаг мөн өвлийн цагт хамгийн хэрэгцээт “ шүдний өвчин” халаалтын системийн талаарх мэдээллийг хүргэж байна.

    Ид өвлийн цагт хамгийн их яригддаг асуудал дулаан. “Дулаан байвал мянган лан” гэдэг. Гэхдээ дулаан, халаалт гэж ярихаасаа өмнө юун түрүүнд сууц, байрныхаа дулаан алдагдлыг багасгах, бууруулах тал дээр анхаарлаа хандуулаарай. Хэрвээ таны сууц дулаан алдаад байвал та хичнээн халаалтын систем, зуух тавиад нэмэргүй. Авч байгаа дулаан, байр сууцны чинь хаа нэг газраар орж ирж байгаа хүйтэн агаар 2 хүч тэнцэнэ гэсэн үг.

 

 

  

  

    Барилгын хамгийн их дулаан алддаг газрууд нь хаалга, цонх учир байр сууцаа дулаалахаас өмнө эхний ээлжинд цонх хаалганы дулаан алдагдлыг багасгах арга хэмжээг авч эхлээрэй. Хаалга цонхондоо жийргэвч хийх, хоорондын зайг чигжих гэх мэт гарын доорх материал ашиглан дулаан алдагдлыг багасгах боломжтой ба зөвхөн цонхыг дулаалснаар дулаан алдагдлыг 5-15%-иар багасгах боломжтой юм. Цонхоор дулаан алдагдал

1.      Цонхны зай завсраар

2.      Шилээр гэсэн 2 замаар алдагддаг бөгөөд хуучин сайтар дулаалах цонхоо солих сайжруулах замаар асуудлаа шийдвэрлэж болох юм. Мөн цонх хаалганаас гадна ханын бүтээц, байшингийн суурь гэсэн сууцны гол хэсгүүдээр дулаан алдагддаг байна.

    Цонхоо аль болох өмнө зүг рүү харуулсан бол өвлийн туршид сүүдэрлэгдэхгүй халаалтын эрчим хүчийг хэмнэж чадахаас гадна цонхоо өмнө зүгээс 20˚ -аар л хазайлгахад эрчим хүч хэмнэх боломж 5% -иар буурдаг гэсэн судалгаа гарсан байна. Харин хойд зүг рүү харсан цонхыг аль болох бага хэмжээтэйгээр гаргаж өгөөрэй.

    Дулаан алдагдлын хамгийн сайн “хулгайч” нь агааржуулалтын систем бөгөөд одоо манай орон сууц болон хувийн сууцанд хийсэн агааржуулалтын системийг том хэмжээтэйгээр сонгосон байдаг. Одоо бидний хуучирсан гэж нэрлээд байгаа угсармал барилгууд дулаахан байдаг нь агааржуулалтын системтэй нь холбон тайлбарлаж болох талтай. Агааржуулалтын нүхийг хэр хэмжээтэй хийнэ тэр хэмжээгээр сууцны дулаан алдагдал хэмжигдэнэ гэдгийг анхаарах нь зүйтэй.

   Мөн дулаан алдагдал бидний төсөөлж, нэг их ач холбогдол өгдөггүй зүйлээс хүртэл хамааралтай байдаг байна. Барилгын хэлбэр төвөгтэй, өнцөг булан их болох тусам гадаргуун талбай ихсэж тэр хэмжээгээр дулаан алдагдал ихэсдэг байна. Харин тухайн сууц, барилгын хэмжээ бага байх тусам дулаан алдагдал бага байна. Мөн тухайн байшин барих гэж байгаа газрын байршлаа хүртэл сайтар анхаарч тэгш газар сонгохыг мэргэжлийн хүмүүс сануулж байна.

   Дулаалгын материалыг сонгохоос өмнө барилгын үндсэн материалаа дулаан тусгаарлах чанарыг зайлшгүй харгалзан үзэх хэрэгтэй.

    Харин дулаалгын материалуудын хувьд янз бүр байдаг. Тухайн хэрэглэгч өөрийн санхүүгийн чадвартаа тохируулан дулаалгын материалаа сонгон авдаг. Дулаалгад хамгийн зохимжтой материалууд нь эрдэс хөвөн, сүрлэн боодол, хөөсөнцөр байдаг. Хэрвээ та дулаалгын материалдаа хөөсөнцөр сонгох гэж байгаа бол 10 см – ээс багагүй байж дулаан алдагдлыг бууруулна. Дулаалгын материал нь хүйтнийг тэсвэрлэх чадвар сайн, олон удаа хөлдөж гэсхэд шинж чанараа алдахгүй байх ёстой. Барилгыг гадна талаас нь дулаалах нь илүү ач холбогдолтой учир нь дотор талаас дулаалсан тохиолдолд сантехникийн элдэв холболтоос шалтгаалан нүх сүв гарч бүрэн дулаалга болж чаддаггүй байна. Мөн хананд цан цохих зэрэг бэрхшээл гарч ирнэ.

   Дулааныг хэр хэмнэх нь барилгын ханын зузаан, дулаан тусгаарлах чанараас шалтгаалах бөгөөд бидний хэрэглэж заншсан тоосго нь дулаан тусгаарлах чадвар бага, зардал өндөрөөс гадна ажиллагаа ихтэй.