Ихэнх хүмүүс болж өгвөл нэг өрөө байр авахыг эрмэлзэх болсон. Гэхдээ тэр жижигхэн байраа яаж ийгээд том болгохыг хичээдэг. Харин харахад л том мэт харагдахуйц болгох боломжтой юм. Үүнд дизайны шийдэл чухал үүрэгтэй. Хана туургыг нь нурааж өгөөд, зарим нэгэн хаалгыг аваад хаячихна. Хэт давчуу өрөөнд шаналж суухын оронд гал тогоо эсвэл үүдний өрөө зэргийг тусгаарлаж байх ханыг нурааж нэгдсэн нэг том өрөө болгох боломжтой юм. Гал тогоог шалны хавтангаар ялгаж болно. Жишээ нь таны том өрөө ламинатан шалтай гэж үзье, тэгвэл гал тогооныхоо шаланд плита наах боломжтой. Харин ханандаа обой эсвэл нийлмэл эдээр хийсэн хавтан нааж өгнө. Мэдээж хэрэг үүдний өрөөг ч тусгай материалаар ялгаж өгөх хэрэгтэй. Өрөө тасалгааг чимэглэх материалыг зөв сонгож авснаар тухайн орон зай нилээд тэлчихсэн мэт харагдах бүрэн боломжтой. Хэт намхан харагдаад байгаа өрөөндөө босоо зураас бүхий обой ханандаа тааз тултал наахад тухайн өрөө өндөр болчихсон мэт харагдана.

Өрөөг яавал том харагдуулах вэ?

Өрөөнийхөө нэг талын хананд завсрын өнгө жишээ нь, цайвар цэнхэр эсвэл цайвар ногоон өнгийн обой наагаад үзээрэй. Харин хажуу талын ханандаа илүү тод өнгөтэй обой ашиглаад үз. Хэрэв таазандаа судалтай обой наавал судлынх нь ширхэгийг тод өнгөтэй хана руу чиглүүлбэл бүр сайн. Өрөөг том болгоход жижигхэн хээ ч чухал үүрэгтэй юм. Ламинат болон хулдаасыг уртааш цонхноос хана хүртэл тавих хэрэгтэй. Хэрэв өөр чиглэлд тавьсан тохиолдолд тухайн өрөө жижиг харагддаг. Гацуур модны шилмүүс шиг байрлалаар паркетан шалыг тавих юм бол нарийхан өрөөг мөн л томсгож өгнө. Хэрэв та шалаа паркетаар бүрэхээр шийдсэн бол нэг зүйлийг мэдэж байхад илүүдэхгүй. Өргөн ширхэгтэй паркет тухайн тасалгааг жижигхэн мэт болгодог бол нарийхан ширхэгтэй паркет эсрэгээрээ өргөн харагдуулдаг. Бидний амьдардаг байр дэндүү давчуу байна хэмээн гомдоллоход хамгийн их нөлөөлдөг тасалгаа бол үүдний өрөө. Үнэхээр ч угсармал нэг өрөө байрны үүд орчим ердөө нэг хавтгай дөрвөлжин метр бүхий өрөө л байдаг. Гэтэл тэдгээрийг бас тодорхой хэмжээгээр тавилгатай болгох шаардлагатай. Гэхдээ дизайны арга барил энд чухал үүрэгтэй. Тиймээс л том тольтой тавилга сонгох хэрэгтэй. Шүүгээ авахдаа хаалга нь нээгддэг бус харин гүйдэг хаалгатайг сонгох нь дээр. Том дөрвөлжин толь таны таазыг өндөрсгөж бага зэрэг том мэт харагдуулах болно. Түүнээс гадна том толийг гэрэлтүүлж өгөхийг зөвлөж байна.

Угаалгын өрөөнд юу хийж болох вэ?

Том ширмэн ванны оронд жижигхэн зай эзлэх шүршүүр тавьж болно. Энэ өрөөнд тодорхой хэмжээний зай гаргахад ханандаа байрлуулсан дүүжэн сантехник чухал үүрэгтэй юм. Ингэснээр бохирыг зайлуулагч усны сав гэх мэтийн ил байдаг зүйлийг хананд нууж болох талтай. Дүүжин угаалтуур ч хананд бүх хоолойг нуух боломжийг олгодог. Заримдаа хананд байх хоолойг нуух боломжгүй байдаг. Тийм тохиолдолд жижигхэн шүүгээн дээр угаалтуураа тавьж болно. Эсвэл дээрээсээ бус урдаасаа угаах зүйлээ хийдэг угаалгын машин дээр ч тавих боломжтой.



 

Харин гал тогоог...?

Жижигхэн гал тогоог мөн л томруулах хамгийн зөв хувилбарын нэг бол “Г” үсгэн хэлбэртэй тавилгыг сонгох эсвэл тавилгаа нэг эгнээнд оруулан байрлуулах юм. Нэг эгнээний тавилгатай болох гэж байгаа бол угаалтуурыг голд нь байрлуулж, плитк болон хөргөгчийг ойролцоо байрлуулна. Харин зуух болон угаалтуурын хооронд бага зэргийн ажлын тавцан бий болгосон нь дээр болов уу. “Г” үсгэн хэлбэртэй тавилга жижигхэн өрөөнд хамгийн тохиромжтой. Гал тогооны өрөөг зөвхөн хоол хийдэг өрөөнөөс гадна хоолоо идээд сууж байхаар тохижуулж байгаа бол хураагаад авчих боломжтой ширээ захиалаарай. Гал тогооны өрөөнд хөргөгчийг сонгохдоо хэт том загвараас татгалз. Мөн зуух ч тийм том байх албагүй. Хэрэв тухайн байранд нэгээс хоёр хүн амьдарч байгаа бол том зуух бүүрч хэрэггүй. Гэх мэтийн арга хэмжээ авахад жижигхэн байрыг амьдрахад тохилог болгох бүрэн боломжтой юм.  

Тагтаа байртайгаа нийлүүлж болно

Тагтыг байртай нийлүүлэх нь хамгийн энгийн төдийгүй хямдаар байраа томсгох арга болон хувирчээ. Том байртай хүмүүс хүртэл тав тухтай орчин бий болгох үүднээс байртайгаа нийлүүлэх болсон. Анхлан харахад тагтыг өрөөний нэгэн хэсэг болгох асуудал их энгийн бөгөөд хялбархан мэт харагдах боловч үнэн хэрэгтээ нилээд хүнд ажлын нэг юм. Тагтыг өөрчлөх гурван хувилбар байдаг. Зүгээр нэг шиллээд орхих хязгаарлалтын байгууламжийг дулаалгатай болгож бусад тасалгаатай нийлүүлэх, тусгай өрөө болгон засч янзлах гэсэн хувилбарууд байдаг. Хэрэв тасалгаа болгоно гэвэл ямар нэгэн хэмжээгээр гадна талын ханыг нураах шаардлагатай тулгардаг. Тагтыг нийлүүлэх ажиллагаа технологийн хувьд их хүнд ажил бөгөөд мэргэжлийн хүмүүстэй заавал ярьж зөвлөгөө авах шаардлагатай байдаг. Ийм ажил хийх гэж байгаа хүмүүст тагт их амархан нэг өрөө болоод хувирчихна гэж бодогдоод байдаг юм. Гэтэл үнэн хэрэгтээ тийм биш гэдгийг дахин хэлмээр байна. Анх барихдаа хуучин загварын байшинд тагтыг ямар нэгэн гал түймэр өөр осол гарсан тохиолдолд хүмүүсийг нүүлгэн шилжүүлэх нэгэн хэрэгсэл болгохоор засч янзалсан байдаг. Тиймээс өөрчлөн зассанаар та ямар нэгэн хэмжээгээр амиа аврах боломжоос татгалзаж байна гэсэн үг юм. Тагтыг өрөө болгон засахад даацын хананд их бага хэмжээгээр нөлөө үзүүлж эхлэнэ. Бүх зүйл байшингийн загвараас хамааралтай. Жишээ нь, тоосгоор хийсэн олон давхар байшинд даацын хана бол голдуу гадна талын хана байдаг. Хэрвээ та их бага хэмжээгээр тэрхүү даацын хананаас нурааж байгаа бол заавал тулгуур хийж өгөх шаардлагатай. Ингэхийн тулд нэгээс хоёр багана босгоход л хангалттай. Мэдээж хэрэг ахуйн талаас аваад үзэх юм бол тийм ч тохитой байж чадахгүй л дээ. Харин угсармал болон блокоор барьсан байшинд хучилтын хавтангийн үргэлжлэл болгож цонхны хэсэг даацын хана болж өгнө. Хэрэв цонх болон тавцангийн хэсгийг зайлуулах тохиолдолд хучилтын хавтангийн бат бөх байдал алдагдаж эхэлдэг. Тагтыг өрөөтэйгөө нийлүүлнэ гэдэг бол тухайн байшингийн дулааны хангамжинд ч нөлөө үзүүлнэ. Мэдээж хэрэг ганцхан тагтны дулаалгатай холбоотой асуудлаас болж тухайн байшинд тэгтлээ их өөрчлөлт гарахгүй ч гэлээ, өндөр байшингийн 5-10 айл зэрэг ийм өөрчлөлт хийж эхэлбэл байшинд бүрэн хэмжээгээр хугацаанаас өмнө их засвар хийх шаардлагатай болно. Харин төгсгөлд хэлэхэд хавтанд хүчтэй нөлөө үзүүлж болохгүй. Тиймээс шиллэх гэж байгаа тохиолдолд доод хэсэгт каркасан эсвэл хөөсөн бетонблокоор өрөлтийг хийж гүйцэтгэвэл тохиромжтой. Ашиглалтын явцад тагт байсан тэр газарт хүнд зүйл байрлуулж, хэрхэвч болохгүй. Жишээ нь хүнд төмөр шүүгээ, ямар нэгэн суурин багаж тоног төхөөрөмж, төгөлдөр хуур зэргийг байрлуулахаас зайлсхийгээрэй. Хэрэв та шиллэлтийг буруу хийж гүйцэтгэсэн тохиолдолд зэргэлдээх айлуудын тагт зузаан мөсөн бүрхүүлээр хучигдах болно. Мэдээж хэрэг үүнээс болоод хөршүүдтэйгээ зөрчилдөхөд хүрч болзошгүй юм. Өөр нэгэн зүйл бол халаалтын системд өөрчлөлт оруулах явдал. Тагтыг дулаан болгох үүднээс халаалтын хоолой татаж, нэмэлт радиатор тавих шаардлагатай болдог. Үүнээс болж дулаалгын шугамд өөрчлөлт гарч болзошгүй юм. Энэ талаар Орон сууцны аж ахуй мэдвэл, тухайн орцны шугаманд хийх засварын ажлын үнэ төлбөрийг таны халааснаас гаргах болно гэдгийг сайтар бодолцох хэрэгтэй.

Барилгын ажлыг бидэнд даатга! Хэрвээ биднээр барилгын ажлын гүйцэтгэлээ хийлгэвэл!!! Интерьерийн зураг төсөл 50% хямдарна.

Утас: 94007217, 99049724, 94721737
Вэб: www.beatificzone.barilga.mn
И-мэйл: info@life-design.mn