ГХБГЗЗГ-ын дарга Ц.Ганхүү, дэд дарга Б.Баярсайхан, ГХХБА-ны дарга Р.Ганхуяг нар "100 мянган айлын орон сууц төсөл"-д зөвлөх үйлчилгээ үзүүлэх БНСУ-ын “LH “корпораци болон БНСУ-д Хөдөлмөр аюулгүй байдлыг хангах тал дээр анхаарлаа хандуулж ажилладаг КОША байгууллагын төлөөлөгчидтэй уулзаж ярилцлаа. БНСУ-ын талаас “LH“ корпорацийн төлөөлөгч Kwon Keun  Euk, Lee Hyun Jae болон КОША байгууллагын төлөөлөгч Kwon Jung Soon, Pak Young Wook, Roh Yun Sang, Dong Seok Changi нар уулзалтад оролцсон. Уулзалтын эхэнд Ц.Ганхүү дарга 100 мянган айлын орон сууц төслийн талаар БНСУ-ын талд тодорхой мэдээллүүд өгч, тэдний сонирхсон асуултад хариулсан. “LH“ корпораци болон КОША байгууллагынхан 100 мянган айлын орон сууц хөтөлбөрт нэг мкв талбайн үнэд төрөөс хязгаарлалт тогтоосон эсэхийг сонирхож байв. Тэд "1 сая айлын түрээсийн орон сууцны хөтөлбөр"  хэрэгжүүлэхдээ томоохон хэдэн компанитай гэрээ байгуулан, нэг мкв талбайн үнэд төрөөс хатуу хязгаарлалтыг тавьж байсан туршлагаа энэ үеэр дурдсан юм. Төр болон хувийн хэвшлийнхэн аль аль тал нь ашгийн төлөө бус нийгмийн сайн сайхны төлөө сэтгэл зүтгэл нэгдэж, гэрээгээ нарийн мөрдсөнөөр хөтөлбөр амжилттай хэрэгжсэн гэдгийг БНСУ-ын төлөөлөгчид онцолсон. "100 мянган айлын орон сууц хөтөлбөр"-т 50 мкв-аас дээшгүй орон сууцыг хамруулахаар төсөлд тусгаад буй. Талбайн хэмжээг Монгол Улсын хөгжлийн хурдтай нийцүүлэн нэмэх хэрэгтэй гэсэн саналыг БНСУ-ын төлөлөгчид хэлж байлаа. Уулзалтын төгсгөлд манай талаас ТЭЗҮ боловсруулахад шаардлагатай бүхий л материал, бичиг баримтыг БНСУ-ын талд өгч танилцуулахаар тохиров.