Улаанбаатар хот түүхэн хөгжлийнхөө явцад 5 удаагийн ерөнхий төлөвлөгөө боловсруулж хэрэгжүүлсэн. Харин энэ удаагийн 2020 он хүртэлх ерөнхий төлөвлөгөөг хуульчлах гэж байгаагаараа онцлогтой.  Улаанбаатар хотын 2020 он хүртэл хөгжүүлэх ерөнхий төлөвлөгөөг УИХ-д өргөн барихаар иргэд, олон нийт, мэргэжлийн байгууллагынханд  шат дараалсан танилцуулга хийсэн. “Улаанбаатар хотыг 2030 он хүртлэх хөгжлийн чиг хандлагыг тодорхойлон 2020 он хүртэл хөгжүүлэх “Ерөнхий төлөвлөгөө”-нд тодотгол хийн боловсруулах ажлын захиалагчаар Нийслэлийн Барилга, хот байгуулалт, төлөвлөлтийн газар, гүйцэтгэгчээр Зураг төслийн хүрээлэн ажилласан.

     Нийслэлийн засаг даргын зөвлөлийн хурлаар Улаанбаатар хотын 2020 он хүртэл хөгжүүлэх Ерөнхий төлөвлөгөөний тодотгол, Зуслангийн ерөнхий төлөвлөгөөг хэлэлцэж, НИТХ-ын Тэргүүлэгчдийн хурлаар хэлэлцүүлэх нь зүйтэй гэж шийдвэрлэлээ.

     Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотголд гэр хорооллыг байршлын хувьд төвийн, дунд, захын гэж ангилан төвлөрсөн инженерийн шугам сүлжээнд холбогдох боломжтой төвийн гэр хорооллыг дахин төлөвлөж , өндөр болон дунд давхрын барилгаар барилгажуулах, дунд хэсгийн гэр хорооллыг нам давхрын барилгажилтаар дахин төлөвлөж, хэсэгчилсэн инженерийн шугам сүлжээнд холбох, захын гэр хорооллын хэсэгт үе шаттайгаар бие даасан шугам сүлжээтэйгээр тухайн газар нутгыг шинэчлэн зохион байгуулахаар төлөвлөсөн байна.

      Төвийн гэр хорооллыг дахин төлөвлөж, орон сууцны хороолол болгон хөгжүүлэх хөтөлбөрийн эхний үе шатанд “Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэх бөгөөд Дунд хэсгийн гэр хорооллыг одоогийн бүрэлдэн бий болсон дэд төвүүдээс эхлэн эргэн тойронд нь үндсэн дэд бүтцийг барьж байгуулан, дэд төв тус бүрт ариутгах татуурга, усан хангамж, дулаан хангамж, зам, далан суваг, цахилгаан хангамж, хатуу хог хаягдлын цогц төслүүдийг хэрэгжүүлэхээр төлөвлөжээ.

     Эдгээр дэд төвүүдэд эдийн засгийн хөгжлийн чадавхитай, ажлын байр бий болгох боломжтой. Гэр хорооллын дэд төвүүд нь хотын орон зайн зохион байгуулалтын гол цэг байна. Дэд төвүүдийг хооронд нь холбох, дэд төвүүдийг хотын төвтэй холбох замуудыг эхний ээлжинд барих шаардлагатай. Захын гэр хорооллын хэсгийг цаашид өргөтгөн тэлэхийг зогсоож, аюултай, тохиромжгүй газруудад байрласан айлуудыг нүүлгэн шилжүүлэх, тогтвортой суурьших боломжтой хэсгийг нь бие даасан шугам сүлжээгээр шинэчлэн зохион байгуулж, нөхцлийг сайжруулах хэрэгтэй гэж үзэж байгаа юм.

    Шинээр гэр хорооллыг байршуулах нөөц талбайг хотын барилгажсан хэсэгт Тахилт, Баруун туруунд төлөвлөсөн боловч эдгээр нь хүн амын өсөлтийн хэрэгцээг хангах боломжгүй гэсэн шалтгаанаар ерөнхий төлөвлөгөөний тодотголд хотын захын хороод, алслагдсан дүүргүүд, дагуул хот тосгодуудыг жигд тэнцвэртэй, эрчимтэй хөгжүүлж, суурьшлын шинэ бүсүүдийг байгуулан Улаанбаатар хотод бий болсон хэт төвлөрлийг сааруулаар төлөвлөж байна.

     Алслагдсан Багануур, Багахангай, Налайх дүүргүүдийг нийслэлийн дагуул хот болгон эрчимтэй хөгжүүлж, шаардлагатай дэд бүтцийг барьж байгуулан хөгжлийн шинэ төвийг үүсгэх, үйлдвэрлэл үйлчилгээг эрчимтэй хөгжүүлэх зорилготой. 2030 он гэхэд алслагдсан дүүргүүдийн хүн амыг өнөөгийн түвшнээс 4,15 дахин нэмэгдэх хандлагатай байгаа болохоор 2030 он гэхэд Улаанбаатар хотод нэг шинэ дагуул хотыг байгуулах төлөвлөгөөтэй байна. Тус хотыг нисэхийн чиглэлд “Аэро сити” нэртэй байгуулах боломжтой юм.