Монгол Улсын нийслэл Улаанбаатар хотын иргэдийн амьдрах болон хүрээлэн буй орчны аюулгүй байдал, хот байгуулалт, төлөвлөлтийн асуудлыг шинжлэх ухааны үндэслэлтэйгээр судлах асуудлыг шийдвэрлэх шинэ шийдэл боловсруулах, шинэлэг санал, санаачилга гаргаж тавих зорилготой “Улаанбаатар-эрүүл, цэвэр аюулгүй хот” сэдэвт эрдэм шинжилгээ, судалгааны ажлын уралдааныг зохион байгуулахаар баталлаа.

     Энэхүү уралдааныг “Азийн том хотуудын аюулгүй байдлын асуудал” Олон улсын 11 дэх удаагийн симпозиумыг Монгол Улсын Ерөнхийлөгчийн ивээл дор 2012 оны 10 дугаар сард Улаанбаатар хотноо зохион байгуулах болсонтой холбогдуулан зарлаж байгаа юм. Уралдааныг дараах сэдвээр зохион явуулах юм байна.

• Агаарын чанар ба бохирдол, түүнийг бууруулах арга зам,

• Усны бохирдол, цэвэрлэх байгууламж, голын усны түвшин, цэвэр усны нөөц,

• Хөрсний бохирдол, эвдрэл, хуурайшилт, тоосжилт, цөлжилт,

• Газар хөдлөлийн эрсдэлээс иргэдийг хамгаалах, зарлан мэдээлэх,

• Орон сууц, нийтийн зориулалтын барилгын чанар, газар хөдлөлтөд тэсвэрлэх байдлыг үнэлэн шийдвэрлэх,

• Гэр хорооллын хөгжлийн шийдэл,

• Газар ашиглалт, газрын менежмент, хот байгуулалт, төлөвлөлт, газарзүйн мэдээллийн системийг ашиглах нь,

• Хотын төвлөрлийг задлах, суурьшлын шинэ бүс байгуулах, дагуул хотуудыг хөгжүүлэх, • Хотын дэд бүтцийн байдал, цаашдын эрэлт, шинэ технологи, шийдэл,

• Замын хөдөлгөөний аюулгүй байдал, хөдөлгөөний бөглөрөл, осол аваар, хөдөлгөөний оновчтой удирдлага, нийтийн тээврийн шинэ систем нэвтрүүлэх боломж,

• Химийн болон хорт бодисын хадгалалт тээвэрлэлт,

• Хот байгуулалт төлөвлөлтөд иргэдийн оролцоог нэмэгдүүлэх нь гэсэн сэдвүүдийн дор шинэ бүтээлч санал, санаачлагуудыг “Хангарьд” ордны 13 давхарт, Нийслэлийн Барилга, хот байгуулалт, төлөвлөлтийн газрын 1303 тоот өрөөнд 2012 оны 4 дүгээр сарын 25-ны 18.00 цаг хүртэл хүлээн авах юм байна.

      Бүтээлийн шалгаруулалтыг 2012 оны 5 дугаар сарын 2-ны өдрийн 10.00 цагаас “Хангарьд” ордны 13 давхарт байрлах “Хот байгуулалтын үзэсгэлэн”-нд нээлттэйгээр хэлэлцэж шилдэг 5 бүтээлийг тус шалгаруулна.

     Илүү дэлгэрэнгүй мэдээллийг “Хангарьд” ордны 13 давхарт, Нийслэлийн Барилга, хот байгуулалт, төлөвлөлтийн газар, 1303 тоот өрөө, Утас 32-40-72, 31-28-26 гэсэн утаснаас лавлаж болох юм байна.