Хувиараа хөдөлмөр эрхэлдэг ч зургаан хувийн хүүтэй зээлд хамрагдаж болно
Монгол Улсын Засгийн газраас бага, дунд орлоготой иргэдийг дэмжиж орон сууцжуулах, мөн агаарын бохирдлыг бууруулах зорилгоор “100 мянган айлын орон сууц” хөтөлбөрийг хэрэгжүүлж эхлээд сар гаруйн хугацаа өнгөрлөө. Энэ хугацаанд нийт 1000 гаруй иргэн банкинд хүсэлтээ гаргасан байна. Одоогийн байдлаар арилжааны хоёр банк уг хөтөлбөрийн дагуу гэрээ хийж ажиллахаар болсон. Төрийн банкны хувьд хөтөлбөртэй холбоотой бичиг баримт бүрдүүлэх зэрэг бэлтгэл ажлууд дууссан. Мөн иргэдээс өргөдөл хүлээж аваад эхэлсэн бөгөөд тус банк одоогоор 50 гаруй иргэнийг зээлд хамруулсан байна. Өөрөөр хэлбэл, орон сууц нь ашиглалтанд орчихвол шууд байрандаа орох боломжтой гэнэ.
Энэ жилийн хувьд нийт 4000 гаруй орон сууцыг ашиглалтад оруулна гэсэн төлөвлөгөөтэй байгаа гэнэ. Хувиараа хөдөлмөр эрхэлдэг, нийгмийн даатгал төлдөггүй ч сарын орлого нь зээлд хамрагдах хэмжээний орлоготой иргэд ямар бичиг баримт бүрдүүлж хөтөлбөрт хамрагдаж болохыг асууж байгаа. Хэрэв иргэн та зах дээр лангуу түрээслэж наймаа хийдэг бол ашиглалтын гэрээ, түрээсийн төлбөр төлсөн баримт, бараагаа тээвэрлэсэн гаалийн бичиг, татварын баримт зэргийн хуулбарыг өргөдлийн хамт бүрдүүлж Орон сууц санхүүжилтын корпорацид хүсэлтээ гаргахад болох юм байна.