Сургалтад  “Цалиг констракшн”  ХХК-ийн ерөнхий захирал Ш.Должинсүрэн “Хөнгөн блокны үйлдвэрийн тухай”, “Бетон зуурмагийн үйлдвэр, бетон шахагчийн тухай”, “Карьерийн тоног төхөөрөмжийн тухай” мэдээлэл,зөвлөгөөг өгсөн бол МХЕГ-ын өргөх машин механизмийн хяналтын ахлах байцаагч Н.Буйдан “Кран өргөх машин механизмийн тухай” мэдээлэл, зөвлөгөөг тус тус өгөв. Барилгын материалын үйлдвэрлэл эрхэлдэг компануудын төлөөлөл, барилгын инженерүүд сургалтад хамрагдаж, санал бодлоо солилцлоо.Тоног төхөөрөмжийн худалдааг олон жил хийх явцдаа хуримтлуулсан туршлага, олж мэдсэн мэдлэгээсээ ийнхүү хуваалцсан юм.

     “Цалиг констракшн”  ХХК нь Хятадын хэд хэдэн том үйлдвэрийн албан ёсны борлуулагч бөгөөд Хөнгөн блок, Бетон зуурмаг, Карьерийн тоног төхөөрөмж, Кран, Өргөх машин механизм худалдан авах сонирхолтой аж ахуйн нэгж, иргэдэд зуучилдаг байна. МХЕГ, Хас лизинг ХХК, Барилга.мн сайт дэмжин ажиллаа.

Ерөнхий захирал Должинсүрэн хэлэхдээ: “100.000 айлын орон сууц хөтөлбөр хэрэгжиж эхэлсэнтэй холбоотой барилгын материал, тоног төхөөрөмж эрэлттэй болж байна. Иймд энэхүү сургалтыг зохион байгуулах нь зүйтэй юм гэж үзсэн. Манайх өөрийн борлуулж буй зүйлсээ санал болгох, тулгах гэж ийм арга хэмжээ зохион байгуулаагүй. Манайхаас авахгүй гэсэн  хүнд ч бид чин сэтгэлээсээ зөвлөхийг хүсдэг. Хамгийн гол нь монголчууд маань мэдлэг  мэдээлэлгүй, учраа олохгүй, аргаа мэдэхгүй, хүнээ танихгүйгээсээ болж эдийн засгийн алдагдалтай наймаа хийгээд, хохироод байгаад сэтгэл эмзэглэдэг учраас л бид ийм цуврал сургалт зөвлөгөө зохион байгуулахаар шийдсэн” гэлээ.

                                                                                                                                                          Х.Бямбазаяа