Зургаан хувийн зээлийн батламжийг 20 хүнд олголоо
“100 мянган айлын орон сууц” төсөл хөтөлбөрийг хэрэгжүүлэх ажлын хүрээнд зургаан хувийн хүүтэй хөнгөлөлттэй зээлд хамрагдахаар материалаа өгсөн 20 хүнд зээлийн батламжийг нь олгох ёслолын ажиллагаа 2012 оны 04 дүгээр сарын 12-нд боллоо. Ёслолын ажиллагаанд Ерөнхий сайд С.Батболд, ЗТБХБ-ын сайд Ц.Дашдорж, ГХБГЗЗГ-ын дарга Ц.Ганхүү, Сангийн дэд сайд Ч.Ганхуяг болон албаны бусад хүн оролцож хөнгөлөлттэй зээлд хамрагдахаар материалаа өгсөн Ж.Ганбат, Д.Батсүх, Н.Хэрлэнтуяа, Т.Өсөхжаргал нарын 20 хүнд Төрийн банкнаас батламжийг нь гардуулсан.
Ерөнхий сайд энэ үеэр “Өнгөрсөн жил Засгийн газар орон сууцны хөтөлбөрийг хэрэгжүүлэхдээ орон сууц барих бодлогыг зөв боловсруулах, татварын орчныг бүрдүүлэх нь зүйтэй гэж үзэн олон зүйлийн хийсэн. Нөгөө талаасаа иргэдийн худалдан авах чадварт дэм болгохоор 6 хувийн хүүтэй зээлийг хэрэгжүүлэхээр хөтөлбөр боловсруулсан нь өнөөдөр биелэлээ олж эхний 20 хүнд батламж гардуулах гэж байгаад баяртай байна” гэж хэллээ.
