Сүхбаатар аймгийн Барилгын салбарын удирдах ажилтны зөвлөгөөн болж өнгөрлөө

Сүхбаатар аймгийн Барилгын салбарын удирдах ажилтны зөвлөгөөн энэ сарын 16-нд анх удаа амжилттай болж өндөрлөлөө.

Зөвлөгөөнд аймгийн Засаг дарга Ж.Батсуурь, ИТХ-ын дарга Д.Шижирбаатар, ГХБХБГ-ын дарга Ч.Ганзориг, ГХБГЗЗГ-ын дэд дарга Б.Баярсайхан, МБХ-ны ерөнхийлөгч М.Батбаатар, МБХ-ны маркетенг менежментийн албаны дарга Г.Шоовдор, аймгийн ЗДТГ-ын ХБХ-ийн дарга Х.Энхцэцэг болон аймгийн барилгын салбарын удирдлагууд, инженер техникийн ажилтан, мэргэшсэн ажилчидыг төлөөлж 70 гаруй төлөөлөгчид оролцлоо.

            Энэ удаагийн зөвлөгөөний гол онцлог нь Сүхбаатар аймагт 2008-2011 оны хооронд хийгдэсэн хөрөнгө оруулалт, гүйцэтгэсэн ажлын тайлан, хэрэгжүүлж буй ажлууд мөн барилгын салбарт тулгамдаж буй асуудал, хэтийн төлөвлөгөө, “100 мянган орон сууц” хөтөлбөрийн хэрэгжилтийг хэрхэн гүйцэтгэх, шинэ техник, тоног төхөөрөмжөөр хангах, инженер техникийн ажилтан, барилгын мэргэшсэн ажилтан бэлтгэхэд хамтран ажиллах, Засгийн газар, төрийн болон төрийн бус мэргэжлийн байгууллагуудад тавих асуудлуудаа харилцан ярилцаж байлаа.

Зөвлөгөөний үеэр аймгийн Засаг дарга Ж.Батсуурь “төр захиргааны байгууллагаас хэрэгжиж буй ажлууд”, аймгийн хэтийн хөгжлийн талаар, ГХБХБГ-ын дарга Ч.Ганзориг “Барилгын салбарт зохион байгуулж, хэрэгжүүлж буй ажил” МБХ-ны ерөнхийлөгч М.Батбаатар “МБХ-ны үйл ажиллагаа, барилгын салбарыг 2016 он хүртэл хөгжүүлэх чиглэл” ГХБГЗЗГ-ын дэд дарга Б.Баярсайхан “Барилгын салбарын өнөөгийн байдал, цаашдын зорилт”, ГХБГЗЗГ-ын БЧАБХ-ийн мэргэжилтэн Э.Энх-Оргил “Зураг төсөл магадлалын асуудалд тавигдах үндсэн шаардлага” сэдвүүдээр илтгэл тавьж ахмад инженер техникийн ажилчид салбарын өмнө тулгамдсан асуудал, ололт амжилтын талаар санал бодлоо илэрхийлж үнэтэй зөвлөгөө өглөө.

Зөвлөгөөнд оролцогсод дараах саналуудыг дэвшүүлж байлаа.

Үүнд: Барилгын чанарт тавигдах хяналтыг цаг тухайд нь хийж байх, барилгын салбар эрчимтэй хөгжиж байгаа учир салбарт ажиллах чадварлаг инженер техникийн ажилчдыг бодлогоор дэмжиж ажиллах, ажилчдын ур чадварыг нэмэгдүүлэх зорилгоор өвлийн улиралд гадаад дотоодод сургах, шинэ техник технологиор компаниудыг бэхжүүлэх, барилын материалын үйлдвэрийг ойрын хугацаанд эрчимтэй хөгжүүлэх, аймгийн  зураг төсөвийн байгууллагатай болох, барилгачдын талбай болон оффисын барилгатай болох, компани болон жижиг дунд үйлдвэрүүдийг тусгай зөвшөөрөлтэй болгох, барилгын гүйцэтгэлийг 2-оос доошгүй жилээр төлөвлөх гэх мэт.

Зөвлөгөөний төгсгөлт ажилдаа амжилт гарган хамт олноо манлайлан ажиллаж байгаа нэр бүхий хүмүүсийг шагнаж урамшуулсан юм.

Бичсэн: А.Алтаншагай